16 adam qaza boldy - Papýa-Jańa Gvıneıadaǵy polıtseılerdiń ereýili tártipsizdikke ulasty

Port-Morsbı men Lae qalalaryndaǵy tártip saqshylarynyń ereýili jappaı tártipsizdikterge ulasty. Keminde 16 adam qaza tapty. Kazinform bul týraly Euronews arnasyna silteme jasap habarlaıdy.

El astanasy Port-Morsbıde bastalǵan kóterilis Lae qalasyna jetti. Keminde 16 adam qaza taýyp, ondaǵan adam jaraqat aldy.

Kóshede polıtsııanyń joqtyǵyn paıdalanǵan qaraqshylar dúkender men saýda ortalyqtaryn tonady. Tártipti qalpyna keltirý úshin bul qalalarǵa basqa provıntsııalardyń polıtseıleri jiberildi.

Tártip saqshylary jalaqynyń tómendigine narazylyq bildirip ereýilge shyqty. Keıin quzyrly organdar jalaqy tóleý júıesindegi aqaýlarǵa baılanysty shegerimder týyndaǵanyn jáne ótemaqy tólenetinin aıtty.