16,3 mln. tonna taza salmaqta astyq jınaý boljanyp otyr - QR AShM

ASTANA. 2 tamyz. QazAqparat - Búgin Úkimet úıinde QR Premer-Mınıstri Serik Ahmetov «Qoljetimdi turǵyn úı - 2020» baǵdarlamasyn júzege asyrý, qurylys ındýstrııasyn damytý jáne egin oraǵyn sapaly ótkizý máseleleri boıynsha selektorlyq rejımdegi keńeste Kólik jáne kommýnıkatsııalar mınıstrligine astyq tasymaldaý úshin qajetinshe vagondarymen qamtamasyz etýdi tapsyrdy. Bul týraly primeminister.kz saıty habarlady.

Egin oraǵy naýqanynyń barysy týraly QR aýyl sharýashylyǵy vıtse-mınıstri Músilim Ómirııaev habarlama jasady.
Onyń deregine qaraǵanda kóktemgi egis jumystarynyń qorytyndysy boıynsha barlyq aýyl sharýashylyǵy daqyldarynyń jalpy egis kólemi 21,4 mln. ga jerdi qurady. Bıyl 15,7 mln. ga alqaptyń dándi daqyldary orylmaq. 2 tamyzdaǵy jaǵdaıǵa sáıkes, 525 myń. ga alqaptan gektaryna ortasha shyǵymdylyǵy 15,7 tsentnerden aınalatyn 830 myń tonna astyq jınaldy.
«Búgingi kúnge 67 paıyzdan astam egistik jaqsy, 30 paıyzdan astamy qanaǵattanarlyq jaǵdaıda tur. Osyǵan baılanysty jalpy 16,3 mln. tonna taza salmaqta astyq jınaý boljanyp otyr», - dep habarlady M.Ómirııaev.
Bıyl kóktemgi egis jáne egin oraǵy jumystaryn qarjylandyrýǵa «QazAgro» jelisi boıynsha 60 mlrd. teńge bólindi. Egin oraǵyna 410 myń. tonna jeńildetilgen dızeldik otyn bólindi.
«Aldyn ala baǵalaýǵa qaraǵanda astyqtyń shyǵymdylyǵy men tutastaı astyq jınaý kórsetkishi 2012 jylǵy deńgeıden joǵary bolady dep kútilýde. Úkimet egin oraǵyn uıymdasqan túrde ótkizý úshin barlyq sharalardy qabyldady. Qarqyndy ustap turý úshin AShM men oblystar ákimderi egin oraǵy jumystaryn turaqty baqylaýda ustap otyrýy qajet», - dep atap kórsetti S.Ahmetov.
Talqylaý qortyndysy boıynsha Úkimet basshysy oblystar ákimderine aýyl sharýashylyǵy taýar óndirýshilerine aýyl sharýashylyǵy tehnıkalaryn daıyndaý máselelerin sheshýge járdem berýge, JJM jáne basqa da resýrstarmen qamtamasyz etýge, Azyq-túlik korporatsııasyna memlekettik qorǵa astyq satyp alý baǵdarlamalaryn oryndaýda kómek kórsetýdi tapsyrdy.
Kólik jáne kommýnıkatsııalar mınıstrligine «Qazaqstan temir jolymen» birlesip astyq tasymaldaý úshin qajetinshe astyq tasymaldaý vagondarymen qamtamasyz etý boıynsha sharalar qabyldaýdy, MGM-ge oblystarǵa janar-jaǵar maılardyń ýaqytynda jetkizilýine baqylaý jasaýdy júktedi.