16-18 maýsymda Almatyda Keden odaǵynyń keden qyzmetteri basshylarynyń kezekti kezdesýi josparlanyp otyr

Bul týraly búgin jýrnalıstermen bolǵan baspasóz máslıhatynda Kedendik baqylaý komıteti tóraǵasynyń orynbasary Igor Ten aıtty.

Onyń sózine qaraǵanda, atalmysh jıynda keden qyzmetteriniń ózara aqparat almasýyna, 2011 jyldyń 1 shildesinen bastap kedendik baqylaýdyń alynýyna qatysty máseleler talqylanbaqshy. Sondaı-aq birqatar tehnıkalyq qujattarǵa qol qoıylady dep kútilýde.

I.Ten sondaı-aq sózinde 2011 jyldyń 1 shildesinen bastap ishki shekaralardaǵy baqylaýdyń alynýy Keden odaǵy Komıssııasy Josparynyń 2009 jyly 21 qazanda bekitilgen, ıaǵnı memlekettik baqylaýdyń kelisilgen túrlerin qazaqstan-reseı shekarasynan Keden odaǵynyń ishki shekarasyna kóshirý boıynsha bóligine sáıkes júzege asyrylatyndyǵyn atap kórsetti.

«Keden odaǵy komıssııasynyń bul sheshiminiń oryndalýy úshin Qazaqstan men Reseı keden qyzmetteri Keden odaǵynyń keden aýmaǵy boıynsha kedendik tranzıt amaldaryn engizý, Keden odaǵy keden organdarynyń normatıvtik-anyqtamalyq aqparat júıesin biryńǵaılaý, taýarlar deklaratsııasynyń, olardy toltyrý tártibiniń biryńǵaı úlgisin qabyldaý, Keden odaǵynyń ishki jáne ózara saýdasynyń birlesken aqparattyq júıesin qalyptastyrý sııaqty birqatar sharalardy júrgizdi»,-dedi tóraǵanyń orynbasary.

Onyń sózinshe, Keden odaǵynyń keden qyzmetteri ózara aqparat almasýdy qamtamasyz etý úshin az ýaqyt ishinde jańa talaptarǵa saı baǵdarlamalyq qamtamasyz etý júıesin jetildirdi. Ústimizdegi jyly Qazaqstan jáne Belarýs Respýblıkalarynyń keden organdary taýarlar deklaratsııasynyń elektrondyq kóshirmeleri, kedendik kiris orderleri jáne aldyn ala sheshimder boıynsha derek qoryn elektrondy almasý jumysyn jalǵastyrýda.