16-17 jeltoqsanda Qazaqstan-Qytaı shekarasyndaǵy beketter jumys istemeıdi
ASTANA. KAZINFORM – Qazaqstan Qarjy mınıstrliginiń Memlekettik kirister komıteti halyqaralyq tasymaldardy júzege asyrý kezinde tasymaldaýshylar men basqa da múddeli taraptardy qysqy kezeńdegi aýa raıy jaǵdaılary men avtojoldardaǵy qozǵalys shekteýlerin eskerýge shaqyrdy.
Ádette, qolaısyz aýa raıy jaǵdaılaryna baılanysty, ásirese Qazaqstan-Qytaı shekarasynda, avtomobıl ótkizý pýnktteriniń ótkizý múmkindigi tómendeýi múmkin. Bul óńirde tómen temperatýra men qatty jelge baılanysty Qytaı tarapynyń belsendiligi azaıýy yqtımal.
Sonymen qatar Qazaqstan Úkimeti men Qytaı Halyq Respýblıkasy Úkimeti arasyndaǵy Qazaqstan-Qytaı memlekettik shekarasy arqyly ótkizý pýnktteri týraly kelisimge sáıkes, eki eldiń merekelik kúnderinde ótkizý pýnktteriniń jumysy ýaqytsha toqtatylady.
Jaqyn arada Qazaqstannyń Táýelsizdik kúnin merekeleýge baılanysty 2024 jylǵy 16-17 jeltoqsan aralyǵynda Qazaqstan-Qytaı shekarasyndaǵy avtomobıl ótkizý pýnktterinde adamdardy, kólik quraldaryn jáne júkterdi ótkizý júzege asyrylmaıdy.
Qazaqstan-Qytaı shekarasyndaǵy temirjol ótkizý pýnktteri shtattyq rejımde jumysyn jalǵastyrady.
Osyǵan baılanysty, Komıtet tasymaldaýshylarǵa marshrýttardy aldyn ala túzetip, ótkizý pýnktteri jumysynyń kestesindegi yqtımal ózgeristerdi eskerýdi usynady.
– Komıtet ótkizý pýnktteri jumysynyń ózgerýine jedel den qoıý jáne tasymaldaýshylardy ýaqytyly habardar etý úshin kórshi elderdiń quzyrly organdarymen belsendi yntymaqtastyq jasap jatyr. Ýaqytsha qolaısyzdyqtarǵa túsinistikpen qaraýlaryńyzdy suraımyz, - delingen habarlamada.
Ózbekstanmen aradaǵy shekara mańynda toqyma óndirisi ashylatynyn jazǵan bolatynbyz.