159 oqýshy alǵash ótetin mamandandyrylǵan robottar festıvaline qatysady

ASTANA. QazAqparat - Qazaqstanda alǵash ret oqýshylar arasynda ótetin mamandandyrylǵan robottar festıvaline ár óńirden 159 oqýshy qatysady, dep habarlaıdy QazAqparat Oqý-aǵartý mınıstrligine silteme jasap.

Festıval 10-11 qańtarda Almaty oblysy Qaskeleń qalasyndaǵy Súleımen Demırel atyndaǵy ýnıversıtette ótedi.

Oqýshylar FIRST halyqaralyq erejeleri boıynsha eki baǵytta baq synaıdy. Birinshi baǵyt – FIRST LEGO League Challenge-ge 10-16 jas aralyǵyndaǵy oqýshylar, ekinshi baǵyt - FIRST Tech Challenge-ge 12-18 jas aralyǵyndaǵy oqýshylar qatysady.

«Oqýshylar arasynda robototehnıka tanymal bolyp keledi. Sońǵy úsh jylda 3 myńnan astam robototehnıka kabıneti ashyldy.

Sondaı-aq qazaqstandyq oqýshylar robototehnıkadan halyqaralyq jarystarda úzdik nátıje kórsetip keledi. Mysaly, qazan aıynda oqýshylarymyz Jenevada ótken robototehnıkadan FIRST GLOBAL CHALLENGE álem jarysynda jeńiske jetti. Keıin shymkenttik oqýshylar Dortmýnd qalasynda ótken robototehnıkadan halyqaralyq olımpıadada alǵash ret ekinshi oryndy ıelendi. Bul jeńistiń barlyǵy bizdiń durys baǵytta jumys istep jatqanymyzdyń dáleli. Robototehnıkany damytý jáne tanymal etý úshin «USTEM Robotics» qoǵamdyq qorymen birlesip mamandandyrylǵan bilim berý uıymdarynyń oqýshylary arasynda alǵash ret respýblıkalyq robottar festıvalin ótkizip otyrmyz. Jarys jeńimpazdary robototehnıkadan Qazaqstan ulttyq quramasy qataryna qosylyp, aldaǵy ýaqytta «FIRST Kazakhstan 2023» respýblıkalyq fınalyna qatysýǵa múmkindik alady», - deıdi «Daryn» respýblıkalyq ǵylymı-praktıkalyq ortalyǵynyń dırektory Ánýar Ýnaıbekov.

Usynylǵan málimetke sáıkes, sońǵy eki jylda 2 myńǵa jýyq muǵalim robototehnıka kýrsynan ótken.