156 tonna kúnbaǵys maıy Qazaqstannan Qytaıǵa flekstank arqyly jóneltildi

ASTANA. KAZINFORM – 156 tonna kólemindegi alǵashqy kúnbaǵys maıy partııasy Shyǵys Qazaqstan oblysynan Qytaıdyń Tszıansý provıntsııasyndaǵy Nantong qalasyna 40 fýttyq konteınerlerdegi flekstank arqyly jóneltildi.

Aýyl sharýashylyǵy mınıstrligi málimetinshe, tasymaldaý «QTJ» UK» AQ men Maıly daqyldardy qaıta óńdeýshiler ulttyq qaýymdastyǵynyń qatysýymen uıymdastyryldy. Júk jóneltýshi – MDQÓUQ quramyna kiretin Altyn Shyghys maı zaýyty.

Marshrýt Qazaqstan men Qytaı arasyndaǵy negizgi saýda baǵyttarynyń biri sanalatyn Dostyq – Alashankoý shekara ótkeli arqyly ótedi. Konteınerler Qazaqstan men Qytaı temirjol ákimshilikteriniń tehnıkalyq talaptaryna sáıkes flekstankpen jabdyqtaldy.

Flekstank – suıyqtyqtardy tasymaldaýǵa arnalǵan ıkemdi rezervýar, ol logıstıkany ońtaılandyryp, shyǵyndardy azaıtýǵa jáne júktiń óńdelý ýaqytyn qysqartýǵa múmkindik beredi.

Jóneltý 2025 jylǵy maýsymda QHR-nyń Chjenchjoý qalasynda ótken saraptamalyq otyrystyń qorytyndysy boıynsha «QTJ» UK» AQ men «KJD» kompanııalar tobynyń kelisimi aıasynda júzege asqan pılottyq jobanyń bóligi boldy. Bul bastama ITC, QazTrade, salalyq mınıstrlikter jáne ózge seriktestermen birlese ázirlengen 2026–2028 jyldarǵa arnalǵan maı-toń maı ónimderi eksportynyń damý jol kartasyna engizilgen.

Jobanyń basty maqsaty – 2028 jylǵa qaraı 1 mlrd AQSh dollarynan astam valıýtalyq túsimdi qamtamasyz etý. Konteınerlik tasymaldardy damytý Qytaıǵa, Taıaý Shyǵys elderine (BAÁ, Katar, Kýveıt, Saýd Arabııasy), sondaı-aq Ońtústik Kavkazǵa (Ázerbaıjan, Armenııa) eksportty keńeıtýge qosymsha múmkindik beredi.

– Zamanaýı logıstıkalyq sheshimder bizge jetkizilim geografııasyn keńeıtip, otandyq maı-toń maı ónimderiniń básekege qabilettiligin arttyrýǵa jol ashady, - dedi MDQÓUQ basqarma tóraǵasy ıAdykar Ibragımov.

Qazaqtyń kúnbaǵys maıy álemdik naryqty qalaı jaýlap jatqanyn jazǵan edik.