155 mln teńge: Astanada 19 adamdy aldaǵan áıel sottaldy
ASTANA. KAZINFORM — Astanada páter satyp alyp, qaıta satý arqyly paıda tabýdy usynǵan áıelge sot úkimi shyqty. Ol osy syltaýmen 19 adamdy aldap, jalpy somasy 155 mln teńgeden asatyn qarajatty ıemdengen. Bul týraly Astana qalasynyń qylmystyq ister jónindegi aýdanaralyq soty habarlady.
Byltyr mamyr aıynan bastap 2026 jyldyń qańtaryna deıingi kezeńde Astana qalasynyń turǵyny Instagram áleýmettik jelisinde Almaty qalasynan tómen baǵamen páterler satyp alý, olardy jóndeý jáne keıinnen paıdamen satý týraly kórineý jalǵan aqparat ornalastyrǵan.
Osy shemany júzege asyrý úshin ol ınvestorlardy tartyp, olar rásimdegen taýarlyq kredıtterdi tóleýge jáne salynǵan qarajat somasynyń 5-10%-y mólsherinde aı saıyn bonýs berýge ýáde etken.
Bastapqyda tólemder basqa jábirlenýshilerden túsken qarajat esebinen júrgizilgen. Keıin tólemder toqtatylyp, ınvestorlar aldyndaǵy mindettemeler oryndalmaǵan. Keltirilgen jalpy zalal 155 mln teńgeden asty.
Prokýror kúdiktige 6 jyl 8 aı merzimge bas bostandyǵynan aıyrý jazasyn taǵaıyndaýdy surady. Aqtaý qalasynyń soty buryn shyǵarǵan úkimdi eskere otyryp, qylmystyq quqyq buzýshylyqtar jıyntyǵy boıynsha túpkilikti jaza belgileý usynyldy. Sondaı-aq prokýror jazanyń oryndalýyn keıinge qaldyrýdy jáne jábirlenýshilerdiń azamattyq talaptaryn qanaǵattandyrýdy surady.
— Aıyptalýshy óz kinásin ishinara moıyndap, páterlerdi qaıta satýmen aınalysýdy kózdegenin, alaıda barlyq ınvestorlarmen esep aıyrysa almaǵanyn túsindirdi. Jábirlenýshiler qarajatty berý jáne kredıtterdi rásimdeý mán-jaılaryn rastap, kredıtter boıynsha bereshek osy ýaqytqa deıin ótelmegenin kórsetti. Olar qatań jaza taǵaıyndaýdy jáne keltirilgen zalaldy óteýdi surady, — delingen aqparatta.
Qylmystyq kodekstiń 190-baby 4-bóliginiń 2-tarmaǵy múlkin tárkileı otyryp, 5 jyldan 10 jylǵa deıingi merzimge bas bostandyǵynan aıyrý jazasyn kózdeıdi.
Sot alaıaqtyń buǵan deıin de osyǵan uqsas qylmystar úshin sottalǵanyn eskerdi. Alaıda osy is boıynsha qylmystar atalǵan úkimder shyǵarylǵanǵa deıin jasalǵan.
Jazany jeńildetetin mán-jaı retinde sottalǵan áıeldiń asyraýynda 4 kámeletke tolmaǵan balanyń bolýy tanyldy. Jazany aýyrlatatyn mán-jaılar anyqtalǵan joq. Jábirlenýshilerdiń sanyn, ótelmegen zalaldyń asa iri mólsherin jáne jábirlenýshilerdiń pikirin eskere otyryp, sot aıyptalýshyny 6 jyl 6 aı merzimge bas bostandyǵynan aıyrý jazasyn taǵaıyndady.
— Aqtaý qalasy sotynyń úkimin eskere otyryp, qylmystyq quqyqbuzýshylyqtar jıyntyǵy boıynsha neǵurlym jeńil jazany neǵurlym qatań jazaǵa sińirý jolymen túpkilikti jaza 6 jyl 6 aı merzimge bas bostandyǵynan aıyrý bolyp belgilendi, — delingen aqparatta.
Qylmystyq kodekstiń 74-babynyń 1-bóligi negizinde sottalǵan áıeldiń asyraýynda 4 kámeletke tolmaǵan balanyń bolýyna baılanysty jazany oryndaý eki jyl merzimge, ıaǵnı 2028 jyldyń 20 qazanǵa deıin keıinge qaldyryldy.
Jábirlenýshilerdiń azamattyq talaptary ishinara qanaǵattandyryldy. Úkim zańdy kúshine engen joq.
Aıta keteıik, Aqmola oblysynyń turǵyny joq páterge 10 mln teńge berip, alaıaqqa aldandy.
