1500-ge jýyq qazaqstandyq terrorızmdi qarjylandyratyndar tizimine engen
Búgin elordada QR Ádilet mınıstrligi janyndaǵy zań jobalaý qyzmeti máseleleri jónindegi vedomstvoaralyq komıssııanyń kezekti otyrysy ótti. Onda qylmystyq jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy máseleler boıynsha elimizdiń keıbir zańnamalyq aktilerine ózgerister men tolyqtyrýlar talqylandy.
Osy máselege qatysty baıandama jasaǵan QR Qarjy mınıstrligi Qarjylyq monıtorıng komıtetiniń tóraǵasy Anýar Jumadildaevtiń aıtýynsha, búginde elimizde terrorızmdi qarjylandyrýshylar tizimine engen 1500-ge jýyq adam bar. Jalpy atalǵan tizimge sottyń sheshimi kúshine engennen keıin ǵana zańdy jáne jeke tulǵalar kirgiziledi.
«Terrorızmdi qarjylandyrýǵa qarsy is-qımyl týraly» zań boıynsha atalǵan tizimge engender shekteýge tap bolady. Olar óte kóp. Salyq tólep, áleýmettik jardámaqy alýǵa ruqsat berilgenimen, olar kommertsııalyq qyzmetpen aınalysa almaıdy. Qazirgi ýaqytta birqatar túıtkildi másele oryn alyp otyr. Máselen, adam jumys istep, nesıe alǵannan keıin belgili bir ýaqyttan soń atalǵan tizimge qosyldy. Ol nesıesin tóleýi qajet. Biraq, zań oǵan muny jasaýǵa múmkindik bermeıdi. Óıtkeni, onyń esepshoty buǵattalǵan. Osy turǵydan alǵanda olarǵa ózderiniń nesıelerin óteýge múmkindik bergimiz keledi», - dedi ol.
Onyń aıtýynsha, mundaı shekteý atalǵan tizimge engen zańdy tulǵalarǵa qatysty da qoldanylady.
«Ol jumysqa ornalasqannan keıin jumys berýshi áleýmettik tólem jasaýy qajet. Biraq, qoldanystaǵy zańnamaǵa sáıkes ol muny jasaı almaıdy. Óıtkeni, ol adam tizimde bar. Biz osy máseleni jeńildetip, adamǵa jumys jasaýǵa múmkindik bermekpiz», - dedi Ánýar Jumadildaev.
Komıtet basshysynyń aıtýynsha, uıym basshysy atalǵan tizimge kiretin bolsa, onda búkil zańdy tulǵalar zardap tartatyn bolady.
«Biz bul rette de qandaıda bir túzetý engizýimiz qajet. Sebebi, olar bıýdjetke tólem jasap, nesıelerin óteı almaıdy. Munyń barlyǵyn sáıkestendirmekpiz», - dedi ol.
