1500-den astam astanalyq «Arman» lagerinde demalady
ASTANA. QazAqparat - Turmysy tómen jáne kóp balaly otbasylardan shyqqan, sondaı-aq, jetim 250 jýyq bala jazǵy demalysyn «Arman» lagerinde ótkizýde. Munda naǵyz balalyq shaq atmosferasy ornaǵan. Kishkentaı astanalyqtar sportpen shuǵyldanyp, túrli konkýrstarǵa qatysady, tálimgerlerimen birge ashyq aýada tynyǵady, dep habarlady elorda ákimdiginiń baspasóz qyzmeti.
Lagerde kún tańǵy jattyǵýdan bastalady. Balalardy sport pen dene shynyqtyrýǵa baýlý úshin salaýatty ómir saltyna basa nazar aýdarylady. Sonymen qatar, olardyń shyǵarmashylyq qabilettilikteri de damytylady. Árbir kún belgili bir qyzyqty taqyrypqa arnalady.
- Munda kesh uıyqtaısyń, aýa taza, ádemi. Qalada mashınalar kóp, bıik úıler. Kún saıyn ótetin bı keshterin unatamyn. Kóńildi, mysaly, keshe jatar jatqansha «Tańqýraı kúni» ótti, - deıdi Kamıla Ahmedjanova.
«Arman» lagerine demalýǵa Astana qalasynyń Arnaıy korrektsııalyq mektep-ınternatynyń da shákirtteri keldi. Munda olar dos bolýdy, birin-biri túsinýdi jáne qoǵamda ómir súrýdi úırenedi.
- Olardy da oıyndarǵa tartýǵa tyrysamyz, árıne, eger qıyn tapsyrmalar bolsa, olarǵa ońaılaryn beremiz, biraq basqa balalardyń janynda bolatyndaı. Olardy bólip tastamaımyz, olar da saý balalardyń istegenin istep, oryndaý kerek, - deıdi «Arman» lageriniń birinshi maýsymyndaǵy aǵa tárbıeshi Jánnat Ábenova.
Balalar tabıǵat aıasyndaǵy demalystyń eń úzdik ekendigin biraýyzdan quptady. Jalpy, lagerde bes maýsym ótkizilmek. Osy ýaqyttyń ishinde munda 1500 astam elordalyq balǵyn tynyǵady. Sonyń ishinde 1000 bala - halyqtyń osal toptaryna jatady, olar úsh maýsym boıy lagerde tegin demalady.
