150 adam «Joǵary oqý ornynyń úzdik oqytýshysy» atandy
ASTANA. KAZINFORM — Jaqynda Almaty qalasynda otandyq ǵylym men joǵary bilimdi damytýǵa eleýli úles qosyp júrgen birqatar ǵalymdar men joǵary oqý oryndarynyń oqytýshylary saltanatty túrde marapattaldy. Bul týraly Ǵylym jáne joǵary bilim mınıstrligi málim etti.
Bul is-shara ǵylym men bilim salasyndaǵy úzdik jetistikterdi baǵalaý, kásibı sheberlikti yntalandyrý jáne ıntellektýaldyq áleýetti arttyrý maqsatynda uıymdastyryldy.
Atap aıtqanda, «Joǵary oqý ornynyń úzdik oqytýshysy» ataǵy elimizdiń ár óńirinen iriktelgen 150 oqytýshyǵa tabystaldy. Konkýrs barysynda qatysýshylardyń kásibı qyzmeti jan-jaqty baǵalandy. Naqtyraq aıtsaq, elektrondyq bilim berý resýrstary men oqý-ádistemelik materıaldardy ázirleý jáne jarııalaý, otandyq jáne halyqaralyq ǵylymı jýrnaldardaǵy jarııalanymdar, patentter, sondaı-aq oqytýshylardyń ózge de ǵylymı-zertteý nátıjeleri negizgi kórsetkishter qatarynda boldy. Sonymen birge oqytýdyń sapasyna, úmitkerlerdiń joǵary jáne joǵary oqý ornynan keıingi bilim berý júıesi úshin bilikti kadrlar daıarlaýǵa qosqan úlesine erekshe nazar aýdaryldy.
Elimizdiń ǵylymy men bilimin damytýǵa ólsheýsiz úles qosyp júrgen úzdik ǵalymdar men oqytýshylardyń eńbegi keńinen ulyqtaldy. Bul — olardyń kópjyldyq qajyrly eńbegine, kásibı adaldyǵyna berilgen joǵary baǵa.
Atalǵan marapat ıegerleriniń biri — Qorqyt ata atyndaǵy Qyzylorda ýnıversıtetiniń «Kompıýterlik ǵylymdar» bilim berý baǵdarlamasynyń jetekshisi Nurbek Qońyrbaev. Ol óz sózinde bul marapattyń ózi úshin úlken mártebe ári zor jaýapkershilik ekenin atap ótti.
— 2025 jylǵy joǵary oqý ornynyń úzdik oqytýshysy» ataǵyn kóp jylǵy tabandy eńbektiń nátıjesi dep esepteımin. Bul marapat — mınıstrlik tarapynan joǵary oqý oryndary oqytýshylarynyń kásibıligin arttyrýǵa baǵyttalǵan júıeli jumystyń naqty kórinisi. Osyndaı múmkindik úshin barsha uıymdastyrýshylarǵa shynaıy alǵysymdy bildiremin, — dedi ol.
«Joǵary oqý ornynyń úzdik oqytýshysy» konkýrsynyń jeńimpazdary qatarynda Ábilqas Saǵynov atyndaǵy Qaraǵandy tehnıkalyq ýnıversıtetiniń qaýymdastyrylǵan professory Alııa Maýsymbaeva da bar. Ol atalǵan ataqqa ıe bolýyn óziniń ǵylymı-zertteý jáne pedagogıkalyq qyzmetimen baılanystyratynyn jetkizdi.
— Bul — meniń ǵylymı eńbegimniń, ǵylymı qyzmetimniń nátıjesi ǵana emes, sonymen qatar áriptesterimizdiń, búkil ujymnyń jáne otbasymyzdyń qoldaýynyń jemisi. Atalǵan ataq bizdiń ǵylym men bilim berý salasyndaǵy jetistikterimizge berilgen ádil baǵa dep sanaımyn, — dedi Alııa Maýsymbaeva.
Sondaı-aq Q.I.Sátbaev atyndaǵy Qazaq ulttyq tehnıkalyq zertteý ýnıversıtetiniń qaýymdastyrylǵan professory Maqsat Kembaev ta úzdik oqytýshylar qatarynan kórindi.
— Memleket tarapynan eńbegimizdiń baǵalanyp, osyndaı joǵary marapatqa ıe bolyp otyrǵanyma óte qýanyshtymyn. Aldaǵy ýaqytta da elimizdiń damýy men ekonomıkasynyń órkendeýi jolynda aıanbaı eńbek ete beremiz. Bul marapat bizge qosymsha motıvatsııa beredi. Barlyq áriptesterimdi búgingi jetistikterimen shyn júrekten quttyqtaımyn, — dedi ol.
Aıta keteıik, Qazaqstan Ortalyq Azııada Tokıo konventsııasyn ratıfıkatsııalaǵan alǵashqy el atandy.