150 myń oqýshy papılloma vırýsyna qarsy vaktsınanyń ekinshi dozasyn alady
ASTANA. KAZINFORM — Elimizde jetkinshek qyzdar arasynda (11-15 jas) jatyr moıny obyrynyń negizgi qozdyrǵyshy, ıaǵnı adam papılloma vırýsyna (APV) qarsy ekpe egýdiń ekinshi kezeńi bastaldy.

— Kúntizbege sáıkes vaktsınatsııa eki ret júrgiziledi, ıaǵnı 11 jastaǵy qyzdar aldymen alǵashqy dozany alady, sodan keıin 6 aıdan keıin ekinshi dozany qabyldaıdy. Qyzdar arasynda vaktsınatsııa qyrkúıekte bastaldy, endi ekpeniń ekinshi dozasyn alý kezeńi keldi, — dedi Densaýlyq saqtaý mınıstrligine qarasty Ulttyq qoǵamdyq densaýlyq saqtaý ortalyǵynyń basqarma tóraǵasy Aıjan Esmaǵambetova.
Onyń aıtýynsha, kez kelgen vaktsınany engizbes buryn onyń tıimdiligine zertteý júrgiziledi.
— Zertteý ár vaktsınaǵa jeke belgilenedi jáne belgili bir dozanyń qanshalyqty ımmýnıtetti qalyptastyratynyn kórsetedi. Keıbir vaktsına bir dozaly, keıbiri eki, tipti tórt dozaly ekpe de bolýy múmkin. Al adam papılloma vırýsyna (APV) qarsy vaktsına egýde eki doza belgilengen. Bul eki doza atalǵan vırýstan tıimdi qorǵaýdy qamtamasyz etedi. Búginde vaktsınanyń birinshi dozasyn shamamen 140 myń jetkinshek qyz aldy, al ekinshi dozany 150 myń qyz bala qabyldaıdy, — deıdi ulttyq ortalyq basshysy.
Aıta keteıik, búgin elordada Ulttyq qoǵamdyq densaýlyq saqtaý ortalyǵynyń uıytqy bolýymen adam papılloma vırýsyna (APV) qarsy ekpe egý sharasyna arnalǵan konferentsııa ótip jatyr. Atalǵan sharaǵa sala mamandary qatysty.
Sondaı-aq, maman adam papılloma vırýsyna qarsy ekpe alý ne úshin mańyzdy ekenin túsindirip berdi.
Buǵan deıin Qazaqstanda er balalarǵa da adam papılloma vırýsyna qarsy vaktsına egý josparda baryn habarlaǵan bolatynbyz.
Eske sala keteıik, byltyr qyrkúıekte elimizde jatyr moıny obyrynyń negizgi qozdyrǵyshy — adam papılloma vırýsyna (APV) qarsy qyzdardy jalpy vaktsınalaý bastaldy. Osy oraıda Kazinform agenttiginiń tilshisi Qazaqstanda atalǵan ınfektsııanyń taralý statıstıkasy qandaı, bul vırýs ne úshin qaýipti jáne nege ekpe alý qajet ekenine sholý jasaǵan edi.
Úkimet adam papıllomasy vırýsyna qarsy vaktsına satyp alýǵa 9,7 mlrd teńgeden astam qarjy bóldi.