150 myń almatylyqty sýmen qamtamasyz etetin «Aqsaı» stantsııasy qarashada iske qosylady
ALMATY. KAZINFORM — Naýryzbaı aýdanynda turǵyndardy sapaly aýyzsýmen qamtamasyz etý úshin birneshe nysannyń qurylysy júrip jatyr. Bul týraly Naýryzbaı aýdany ákimi Nazıra Toǵyzbaeva aıtty.
Naýryzbaı aýdanynyń basym bóligi Almaty oblysynan qosylǵan taýly aýmaq. Sondyqtan munda aýyzsý máselesi ótkir. Nazıra Toǵyzbaevanyń aıtýynsha, bıyl qarasha aıynda táýligine 22 myń tekshe metr sý ótkizýge qabiletti «Aqsaı» sý tartý nysanynyń qurylysy aıaqtalady. Nysannyń jalpy quny — 29,7 mlrd teńge. Qazir jumystyń 80%-y aıaqtalǵan.
— Sý tartý nysanyna aparatyn 9 shaqyrym jol men 5 kópir salynyp jatyr. Bul strategııalyq mańyzdy nysan aýdannyń batys bóligi men oblystyń Qarasaı aýdanyndaǵy 150 myń adamdy aýyzsýmen qamtamasyz etedi, — dedi Nazıra Toǵyzbaeva.
Odan bólek «Aqjar» jobasynyń aıasynda 2024 jyly 14 shaqyrym sý qubyry men 12 shaqyrym káriz jelisi salynǵan. 2025 jyly bul jumys jalǵasyp, taǵy 17 shaqyrym sý qubyry men 15 shaqyrym káriz jelisi salynyp jatyr.
— «Tastybulaq» pen «Taýsamaly» jobalaryna memlekettik saraptamadan oń qorytyndy aldyq. Bul jobalar boıynsha josparlanǵan jumystyń jalpy quny — 9,6 mlrd teńge. Atalǵan jobalar aýdannyń ornyqty damýyna qajetti myqty ınjenerlik negiz qalyptastyryp, turǵyndardyń jaıly ómir súrýi men qaýipsizdigin arttyrady, — dedi aýdan ákimi.
Eske salaıyq, buǵan deıin Almatynyń «Ermensaı» shaǵyn aýdanynda aýyzsý tapshylyǵy máselesin sheshý maqsatynda reversıvti sý qubyrynyń qurylysy júrip jatqanyn jazǵanbyz.