150 qusynan aıyryldy: SQO-da jyrtqysh ańdar aýyl turǵyndaryna maza bermeı tur
PETROPAVL. KAZINFORM — Soltústik Qazaqstan oblysy Jambyl aýdany Troıtskoe eldi mekeninde bir otbasy baǵyp otyrǵan 150 taýyq-qazynan aıyryldy. Aýyl turǵyndarynyń aıtýynsha, búginde olardan maza ketken. Qarsaq pen túlki kóshege kirip, qoradaǵy qaz-úırekke shaýyp jatyr.
— Aýla shıfermen jáne bıiktigi 1,5 metrlik temir tormen qorshalǵan, jabyq tur. Biraq túnde belgisiz ań kirip, qustardyń barlyǵyn tamaqtap ketken. Jalǵyz bolmaǵan syńaıly. 50 bas qustyń tek 14-i ǵana qaldy. Eskertý úshin bul vıdeony túsirip jatyrmyn, jabyq qoraǵa qamańyzdar, mindetti túrde shatyry bolsyn, — deıdi Troıtskoe aýylynyń turǵyny.
Oblystyń basqa eldi mekenderinde de bul másele bar. Jergilikti bılik ókilderi turǵyndarǵa saqtyq sharalaryn kúsheıtýge keńes berdi.
— Jambyl aýdanynyń veterınarııalyq stantsııasynyń málimetinshe, qarsaqtar, túlkiler, sondaı-aq qańǵyrǵan ıtterdiń kóbeıýine baılanysty jeke úı sharýashylyqtarynyń ıelerine saqtyq sharalaryn saqtaý usynylady. Túngi ýaqytta qaqpany, qora-qopsy esikterin jaýyp qoıý, al úı qustaryn jabaıy janýarlar kire almaıtyn qoralarda nemese basqa da jabyq oryndarda ustaý qajet. Osy saqtyq sharalary saqtalmaǵan jaǵdaıda, jyrtqysh ańdardyń úı qustaryna shabýyl jasaý qaýpi bar, — deıdi Jambyl aýdany ákimdiginiń ókilderi.
Buǵan deıin SQO-da ańshylyq maýsymy qashan bastalatynyn jazǵan edik.
