150-diń ornyna 300 bala: Lagerlerde qandaı kemshilikter anyqtalyp jatyr

ASTANA. QazAqparat – Densaýlyq saqtaý vıtse-mınıstri Aıjan Esmaǵambetova sanıtarııalyq qyzmetter balalar demalatyn lagerlerde qandaı kemshilikterdi anyqtaǵanyn aıtty, dep habarlaıdy QazAqparat tilshisi.

«Áleýmettik jelilerde lagerlerdiń qyzmeti týraly túrli aqparattyń paıda bolýyn eskere otyryp, prokýrorlar osy nasandardy tekserýge kiristi. Bizdiń aýmaqtyq departamentter de osy tekserýlerge qatysyp jatyr. Jalpy, 170 lager qamtylady, onyń 19-y boıynsha tekserý is-sharalary aıaqtaldy», - dedi A. Esmaǵambetova Ortalyq kommýnıkatsııalar qyzmetindegi baspasóz máslıhatynda.

Aıtýynsha, lagerler sanıtarlyq-epıdemıologııalyq qorytyndy alǵanda, bir maýsymda 150 bala demalatynyn kórsetedi. Al is júzinde 300 balany ornalastyrady.

«Árıne, 150 jetkinshekke eseptelgen nysanda 300 balaǵa tıisti jaǵdaı jasaý múmkin emes qoı!? Osynyń saldarynan sý sapasyna, káriz júıesine qatysty kemshilikter shyǵyp jatyr. Sonymen qatar balalardyń tamaqtanýy boıynsha talaptar oryndalmaǵan. Ónim sapasy men qaýipsizdigin rastaıtyn qujattar joq. Atap aıtqanda, azyq-túlik tıisti nysandarda saqtalmaǵan. Keıbir qyzmetkerlerdiń medıtsınalyq tekserýden ótpegeni anyqtalyp jatyr», - dedi vıtse-mınıstr.

Sondaı-aq Aıjan Esmaǵambetova balalar demalatyn lagerlerde sanıtarııalyq normalar oryndalmaǵan jaǵdaıda mekemelerge qandaı shara qoldanylatynyn aıtty.