150-deı atyraýlyq otbasy baspanaly boldy
ATYRAÝ. QazAqparat – Táýelsizdik kúni qarsańynda Atyraý qalasynyń Bereke shaǵyn aýdanda salynǵan úılerdiń páter kiltteri tabys etildi. Іs-sharaǵa oblys ákimi Mahambet Dosmuhambetov qatysyp, turǵyndardy qonys toıymen quttyqtady, dep habarlaıdy Atyraý oblystyq kommýnıkatsııalar qyzmeti.
144 páter «Nurly Jol» memlekettik baǵdarlamasy aıasynda salynǵan kóp qabatty turǵyn úıden berildi. Baspanaly bolǵandardyń basym kópshiligi memleket qamqorlyǵy sanatyna jatatyn az qamtylǵan jáne kópbalaly otbasylar men jetim balalar.
«Memleket basshysy halyqtyń az qamtylǵan tobyn baspanamen qamtýǵa erekshe kóńil bólýdi tapsyrǵan edi. Bıyl uzaq jyldar qınalyp kelgen biraz jerlesimiz baspanaly boldy. Budan tys jyl aıaǵyna deıin uzaq ýaqyt kezekte turǵan azamattar men apatty jataqhana turǵyndarynyń birazyn jańa úılerge kóshiremiz. Jerlesterimizdi qýanyshqa keńeltý jumystary baspanaǵa muqtaj otbasylardyń máselesi tolyq sheshilgenge deıin jalǵasady»,- dedi óńir basshysy Mahambet Dosmuhambetov.
Jyl basynan beri kezekte turǵan 363 otbasy jańa qonysqa ıe bolǵan. Bunyń syrtynda apatty úıler men jataqhanalarda turatyn 481 otbasy da baspanaly bolǵan.
«Men 2008 jyldan beri úı kezeginde turǵanmyn, búgin qýanyshty sátti bastan ótkerýdemin. Karantın jaǵdaıynda talaptardy qatań saqtaı otyryp, Elbasynyń tapsyrmasyn júzege asyryp, qurylys jumystaryn toqtatpaı, baspanamen qamtyp otyrǵan oblys ákim Mahambet Dosmuhambetovke sondaı-aq qala ákimine sheksiz alǵysymdy bildiremin! Táýelsizdigimiz tuǵyrly, bolashaǵymyz baıandy bolsyn!»,- dedi jańa qonys ıesi Qonysqalı Sattyǵulov.
Sondaı-aq, bıyl qaýipti jaǵdaıdaǵy 10 úıdiń turǵyndary páterli bolyp, Qarabatan eldi-mekenindegi 24 otbasy Juldyz yqsham aýdanyndaǵy jańa úılerge kóshirilgenin de aıta keteý kerek.
Osylaısha jyl basynan beri myńǵa jýyq atyraýlyq baspanaly boldy. Al jyl sońyna deıin apatty úıler men jataqhana turǵyndaryna taǵy da 332 páter beriledi dep josparlanyp otyr.
