150-den astam qazaqstandyq stýdent shetelde tájirıbeden ótti

ASTANA. KAZINFORM — Qazaqstan kolledjderi halyqaralyq yntymaqtastyq pen akademııalyq utqyrlyqty belsendi damytyp keledi. 2025 jyly shetelde elimizdiń 10 kolledjinen 150-den astam stýdent bilim alyp, tájirıbeden ótti. Bul týraly Oqý-aǵartý mınıstrliginiń baspasóz qyzmeti habarlady.

Baǵdarlamalar tehnıkalyq jáne kásiptik bilim berý júıesin 2025–2027 jyldarǵa transformatsııalaý jónindegi Jol kartasy jáne Jumysshy mamandyqtar jyly aıasynda júzege asyrylyp jatyr.

Negizgi maqsat — tájirıbe almasý, zamanaýı tehnologııalardy meńgerý jáne bolashaq mamandardyń eńbek naryǵynda básekege qabilettiligin arttyrý.

— Qazaqstandyq stýdentter tamaqtaný, servıs, IT, energetıka, ınjınırıng, dızaın jáne avtomehanıka baǵyttary boıynsha Túrkııa, Qytaı, Qyrǵyzstan, Frantsııa, Ispanııa, Ońtústik Koreıa, Ózbekstan, Ulybrıtanııa, Germanııa jáne Shveıtsarııa elderinde qysqa merzimdi kýrstardan, tájirıbeden jáne taǵylymdamadan ótti — deıdi tehnıkalyq jáne kásiptik bilim departamentiniń dırektory Áset Mýhanbetov.

Akademııalyq utqyrlyq Qazaqstannyń tehnıkalyq jáne kásiptik bilim berý júıesin álemdik bilim berý keńistigine yqpaldastyrý jolyndaǵy mańyzdy qadam.

Aıta ketelik qazaqstandyq oqýshylar Halyqaralyq olımpıadada segiz medal jeńip aldy.