150 adam jalǵan qujatpen Qazaqstanǵa kirmek bolǵan

ASTANA. QazAqparat – Shekarada jalǵan qujattardy paıdalanǵan 150-den astam adam ustaldy. Bul týraly Ulttyq qaýipsizdik komıteti Shekara qyzmetiniń bıylǵy birinshi jartyjyldyqtaǵy qyzmetiniń qorytyndysyna arnalǵan brıfıngide Shekaralyq baqylaý departamenti bastyǵynyń birinshi orynbasary Ǵanı Aǵadilov aıtty, dep habarlaıdy QazAqparat tilshisi.

«Elimizge keletinderdiń aǵyny artyp keledi. Sonymen qatar Qazaqstanǵa zańsyz nemese jalǵan qujattarmen kirýge áreket jasaǵan sheteldikterdiń sany artty. Atap aıtqanda, kirý-shyǵý ótkelinde bóten jáne jalǵan qujattar men Qazaqstan Respýblıkasy vızalaryn qoldanǵan 150-den astam adam ustaldy. Bul adamdar elge kirgizilmeı, óz elderine deportatsııalandy», - dedi Ǵ. Aǵadilov Ortalyq kommýnıkatsııalar qyzmetinde.

Onyń aıtýynsha, zańnamany buzǵany úshin 5 myńnan astam adam jáne 10 kólik kompanııasy ákimshilik jaýapkershilikke tartyldy. Munymen qosa, qylmys jasaǵany úshin izdeýde júrgen 227 Qazaqstan azamaty men sheteldikter ustaldy.

«Pasporttyq baqylaý barysynda shet memleketterdiń azamattyǵyn alǵan Qazaqstan Respýblıkasynyń 254 azamaty anyqtaldy. Bul adamdardy Qazaqstan azamattyǵynan shyǵarý jáne ákimshilik jaýapkershilikke tartý úshin ishki ister organdaryna tapsyryldy», - dedi Shekaralyq baqylaý departamenti bastyǵynyń birinshi orynbasary.