15 jyl Qostanaı túrmesinde bolǵan aıý haıýanattar baǵyna jiberildi
QOSTANAI. QazAqparat - 15 jyl boıy Qostanaıdaǵy qonys kolonııasynda bolǵan Ekaterına esimdi aıý Petropavldaǵy shaǵyn haıýanattar baǵyna jiberildi, dep habarlaıdy QazAqparat.
Qostanaı oblysy boıynsha qylmystyq atqarý júıesi departamentiniń baspasóz qyzmetiniń aqparatynsha, Ekaterına aıýyna ÝK-161/2 mekemesinde jazasyn ótep jatqan sottalǵandar kútim jasap kelgen.
«Ony qonys kolonııasyndaǵylar «Katıa» dep ataıdy. Ol endi Petropavl qalasynda ornalasqan «Abakshıno» demalys bazasyna jiberildi. Demalys ornynda shaǵyn haıýanattar baǵy bar. Ataqty «Katıa» medıtsınalyq tekserýden ótken soń, demalys bazasyna kóshiriledi», - delingen vedomstvonyń baspasóz habarlamasynda.
Aıta keteıik, Ekaterına aıýy ÝK-161/2 mekemesine 2004 jyly ákelingen bolatyn. 2010 jyly aıýdyń qurmetine eskertkish-bıýst ornatyldy.
