15 jyl kezekshiligimde adam ólimi bolǵan joq – órt sóndirý qyzmetiniń dıspetcheri

Raıhan Nútpaevanyń aıtýynsha, ol órt sóndirý qyzmetine kezdeısoq kelgen. Jumysqa qabyldaý júrip jatqanyn bilgen týysy oǵan osy qyzmetke baryp, baǵyn synaýǵa keńes beredi. Búginde Raıhan Baltabekqyzynyń bul salada eńbek etip jatqanyna 15 jyl.

«Bastapqyda bul jumysty qalamaı, ýaqytsha dep keldim. Qazir ózimdi bul qyzmetsiz elestete almaımyn. Biz shaqyrtýdy qabyldap, tez arada órt sóndirý quramyn oqıǵa ornyna jiberýimiz kerek. Mundaıda ár sekýnd qymbat. Der kezinde jetken kómek adamnyń ómirin saqtaıdy. Kezekshilikti qabyldaǵannan keıin 24 saǵat órt sóndirý bóliminde belgilengen kún tártibine baǵynamyz. Kún saıyn dıspetcherler de, órt sóndirýshiler de bilim jetildirip, dárister tyńdap, dápterge túsiremiz. Taqyryp - basqarý qujattaryn zertteý, bólimshede bar jabdyqtarmen, quraldarmen, avtomobıldermen jumys», - deıdi Raıhan Nútpaeva.

Mamannyń aıtýynsha,15 jyldyń ishinde onyń aýysymynda bir ret te ólim jaǵdaıy bolmaǵan.

«Bul menimen birge kezekshilikke túsetin órt sóndirý quramynyń eńbegi. Biz birlese jumys istegende ǵana jaqsy nátıjege qol jetkizemiz. Áriptesterim jaıynda aıtar bolsam, olardyń árqaısy basqany qutqarý úshin óz ómirlerin qurban etýge daıar. Máselen, janyp jatqan úıden turǵyndy shyǵarmaq bolǵan áriptesime ovcharka ıt shabýyldap, onyń oń aıaǵyn qatty jaraqattady», - deıdi Raıhan Baltabekqyzy.

Raıhan Nútpaeva, sondaı-aq donor. Qan ortalyǵyna baryp, únemi qan tapsyryp turady. Qoǵamdyq jumystarǵa da belsene aralasady. Al qoly bos ýaqytta súıikti ánshileriniń kompozıtsııasyn shyrqaǵandy unatady.

«Qınalǵan, jylaǵan kezderim boldy. Alaıda ulyma bir ret te kóz jasymdy kórsetken joqpyn. Balama durys tárbıe berýge tyrystym. Men onymen qatal da, meıirimdi de boldym. Ulym ómirde óz jolyn tapty. Ol Almatyda áskerı qyzmet atqarady, sheni – kapıtan», - deıdi órt sóndirý qyzmetiniń dıspetcheri Raıhan Nútpaeva.