15 jyl buryn egemendi elimizdiń uzaqmerzimdi damý jolyn belgilegen «Qazaqstan - 2030» Strategııasy qabyldandy

Qazaqstan Respýblıkasy Prezıdenti 1997 jyly qazanda «Barlyq qazaqstandyqtardyń ósip-órkendeýi, qaýipsizdigi jáne ál-aýqatynyń artýy» atty el halqyna Joldaýynda Qazaqstan Respýblıkasynyń 2030 jylǵa deıingi damý strategııasyn usyndy. «Qazaqstan­ ­- 2030» strategııasy egemendi respýblıkanyń ekonomıkasy serpindi damyp kele jatqan álemdegi eń bir qaýipsiz, turaqty, ekologııalyq ornyqty elge aınalýyna baǵyttalǵan uzaq merzimdi damý jolyn belgilep berdi.

         «Qazaqstan-2030» damý strategııasy uzaq merzimdi jeti basymdyqty iske asyrýdy qarastyrady:

• Ulttyq qaýipsizdik.
• Іshki saıası turaqtylyq pen qoǵamnyń toptasýy.
• Shetel ınvestıtsııalary men ishki jınaqtalymdardyń deńgeıi joǵary ashyq naryqtyq ekonomıkaǵa negizdelgen ekonomıkalyq ósý.
• Qazaqstan azamattarynyń densaýlyǵy, bilimi men ál-aýqaty.
• Energetıka resýrstary.
• Infraqurylym, ásirese kólik jáne baılanys.
• Kásibı memleket.

Bul basymdyqtar eldiń damýynyń orta merzimdi jáne uzaq merzimdi kezeńge arnalǵan damý josparyn qalyptastyrý úshin negiz qalady. «Qazaqstan - 2030» damý strategııasyn iske asyrýdyń alǵashqy uzaq merzimdi kezeńi Qazaqstan Respýblıkasy Prezıdentiniń 2001 jylǵy jeltoqsandaǵy Jarlyǵymen bektilgen Qazaqstan Respýblıkasynyń 2010 jylǵa deıingi Strategııalyq damý jospary boldy. «Qazaqstan-2030» damý strategııasynyń kelesi kezeńi - Qazaqstan Respýblıkasynyń 2020 jylǵa deıingi Strategııalyq damý jospary bolyp tabylady.