15 jylǵa deıin bas bostandyǵynan aıyrý: prokýratýra jemqorlyqqa qarastyrylǵan jazany eske saldy
ASTANA. KAZINFORM – Astana qalasynyń prokýratýrasy Qazaqstan Respýblıkasynyń zańnamasyna sáıkes qandaı áreketter sybaılas jemqorlyqqa baılanysty qylmystarǵa jatatynyn jáne olar úshin qandaı jaza qarastyrylǵanyn túsindirdi.
Astana qalasy prokýrorynyń kómekshisi Nurdáýlet Abýov atap ótkendeı, Qazaqstannyń qylmystyq zańnamasy para alý nemese para berý úshin ǵana emes, sonymen qatar paraqorlyqta deldal bolý, qyzmettik ókilettikterdi teris paıdalaný, bılikti nemese qyzmettik ókilettikterdi asyra paıdalaný, senip tapsyrylǵan múlikti ıemdenip alý jáne basqa da zańsyz áreketter úshin jaýapkershilikti kózdeıdi.
— Sonymen qatar, zań para alý jáne usyný úshin qatań jaýapkershilikti belgileıdi. Bul qylmys úshin eń joǵary jaza - 15 jylǵa bas bostandyǵynan aıyrý. Munymen qosa, zańda múlik tárkilenip, belgili bir laýazymdardy atqarýǵa nemese belgili bir kásibı qyzmet túrlerimen aınalysýǵa ómir boıyna tyıym salý kózdelgen. Osylaısha, sybaılas jemqorlyqqa baılanysty qylmys jasaý tek bas bostandyǵynan aıyrýǵa ǵana emes, sondaı-aq aýyr qarjylyq jáne kásibı saldarǵa da ákelýi múmkin», - dedi Nurdáýlet Abýov Astana qalasynyń kommýnıkatsııalar qyzmetindegi brıfıngide.
QR Qylmystyq kodeksiniń 366-babyna sáıkes, para alý – laýazym ıesiniń óz qyzmettik ókilettigin paıdalanýǵa baılanysty belgili bir áreketterdi jasaǵany úshin aqshany, múlikti, múliktik quqyqtardy zańsyz alýy. Para tikeleı nemese deldal arqyly berilýi múmkin.
Zańsyz syıaqy qujattardy qarastyrýdy jedeldetý, belgili bir sheshimderdiń qabyldanýyna yqpal etý, memlekettik satyp alý kezinde artyqshylyqtarǵa ıe bolý nemese jaýapkershilikten qutylý maqsatynda usynylýy múmkin.
QR Qylmystyq kodeksiniń 367-baby para berý úshin jeke qylmystyq jaýapkershilikti belgileıdi. Jaýapkershilikke zańsyz syıaqyny alǵan laýazymdy ıesi ǵana emes, sondaı-aq belgili bir máseleni sheshý maqsatynda ony bergen adam da tartylady.
Mysaly, ákimshilik hattama toltyrylýynyń aldyn alý úshin polıtsııa qyzmetkerine nemese zańsyz artyqshylyq alý maqsatynda memlekettik qyzmetshige aqsha berý de qylmystyq quqyq buzý deregi retinde sanalady.
Aıta keteıik, bıyl 11 qarashada «Samuryq-Qazyna» AQ basqarma tóraǵasy N. Jaqypov, «QTJ» UK» AQ basqarma tóraǵasy E. Otynshıev jáne sybaılas jemqorlyq qylmysyn jasady degen kúdikke ilingen ózge de adamdar ustaldy.