15 jyldaǵy eń joǵary kórsetkish: elimizde 24,3 mln tonna astyq jınaldy
ASTANA. KAZINFORM — 2026 jylǵy egin jınaý naýqanynyń qorytyndysy boıynsha Qazaqstanda 24,3 mln tonna astyq jınaldy. Bul — sońǵy 15 jyldaǵy eń joǵary kórsetkishterdiń biri. Osy ýaqyt aralyǵynda mundaı nátıjeden joǵary kórsetkish tek eki ret tirkelgen.
Bul nátıje otandyq aýyl sharýashylyǵynyń múmkindigi joǵary ekenin jáne dıqandardyń eldi azyq-túlikpen qamtamasyz etýge qosqan úlesin kórsetedi.
Bıyl jınalǵan astyqtyń kólemi ǵana emes, sapasy da jaqsy. Aldyn ala málimet boıynsha, elevatorlarǵa tapsyrylǵan jumsaq bıdaıdyń shamamen 72%-y úshinshi synypqa jatady.
Zerttelgen bıdaı úlgileriniń 48%-ynda dán mańyzynyń mólsheri 28%-dan joǵary. Aqmola oblysynda úshinshi synypty bıdaıdyń úlesi 90%-ǵa, al aqýyzy joǵary Hi-Pro sanatyndaǵy bıdaıdyń úlesi 70%-ǵa jetti.
Astyq sapasynyń joǵary bolýy ony azyq-túlik óndirýge keńinen paıdalanýǵa, óńdeý kásiporyndaryn damytýǵa jáne qazaqstandyq ónimniń sheteldik naryqtardaǵy básekege qabilettiligin arttyrýǵa múmkindik beredi.
Aýyl sharýashylyǵy mınıstrligi málimetinshe, Qazaqstan astyq eksportynda da joǵary nátıjeler kórsetip otyr. Sońǵy eki marketıngtik jylda elimiz 15,5 mln jáne 16 mln tonna astyq pen un eksporttady. Bul — táýelsizdik jyldaryndaǵy rekordtyq kórsetkishter.
«Qazaqstan temir joly» UK» AQ málimetinshe, 2026 jylǵy qyrkúıekten 19 qazanǵa deıin Qazaqstan 1,657 mln tonna astyq eksporttaǵan. Bul ótken kezeńmen salystyrǵanda 9% kóp.
Aýyl sharýashylyǵynyń ónimdiligin arttyrý úshin memleket agrarshylardy qoldaý jáne salany jańǵyrtý jumystaryn jalǵastyryp keledi. Atap aıtqanda, sharýalarǵa jeńildetilgen nesıe berý, aýyl sharýashylyǵy tehnıkasyn jańartý, sapaly tuqymdar men mıneraldy tyńaıtqyshtardy jetkizý, zamanaýı tehnologııalardy engizý jumystaryna basymdyq berilip otyr. Sonymen qatar jer men sýdy tıimdi paıdalaný jáne klımattyń ózgerýine beıimdelý máselelerine kóńil bólinip jatyr.
Sońǵy úsh jylda mıneraldy tyńaıtqyshtardy qoldaný kólemi úsh esege jýyq ósti. 2025 jyly sharýalar 1,8 mln tonna tyńaıtqysh paıdalanǵan. Al 2026 jyly josparlanǵan 2,3 mln tonnanyń 2,1 mln tonnasy egistikke engizildi. Sapaly elıtalyq tuqymdardyń úlesi 12%-ǵa jetti. Bul aldaǵy ýaqytta ónim kólemi men sapasyn arttyrýǵa yqpal etedi.
Bıyl egin jınaý jumystaryna 130 myńnan astam traktor, 29 myń astyq jınaıtyn kombaın, 17 myń jatka jáne basqa da 130 myńǵa jýyq aýyl sharýashylyǵy tehnıkasy jumyldyryldy.
Aýyl sharýashylyǵy tehnıkasyn jańartý nátıjesinde onyń tozý deńgeıi 2023 jylǵy 85%-dan 2025 jyly 65%-ǵa deıin tómendedi. 2026 jyldyń qorytyndysy boıynsha tehnıkany jańartý deńgeıin 8%-ǵa jetkizý josparlanyp otyr.
Sharýalarǵa tehnıka satyp alýǵa jeńildetilgen lızıng baǵdarlamasy da kómektesip jatyr. Baǵdarlama bastalǵaly beri agrarshylar 12,7 myńnan astam traktor men 2 340 astyq jınaıtyn kombaın satyp aldy. Búginde osy baǵdarlama arqyly alynǵan tehnıka elimizdegi traktorlar men astyq jınaıtyn kombaındardyń jalpy sanynyń shamamen 10%-y.
Aldaǵy ýaqytta aýyl sharýashylyǵyndaǵy negizgi mindetter — ónim kólemin arttyrý, astyq sapasyn jaqsartý, zamanaýı tehnologııalardy keńinen engizý jáne sharýalardy qajetti tehnıkamen, tuqymmen, tyńaıtqyshpen qamtamasyz etý.
Bul jumystar aýyl sharýashylyǵynyń turaqty damýyna, klımattyq ózgerister men syrtqy qıyndyqtarǵa tótep berýine jáne elimizdiń eksporttyq áleýetin arttyrýǵa múmkindik beredi.
Aıta keteıik, 2029 jylǵa deıin astyqty tereń óńdeıtin 6 iri jobany iske asyrý josparlanyp otyr. Olardyń jalpy qýaty jylyna 5,8 mln tonna shıkizatty óńdeýge jetedi. Bul týraly Úkimet otyrysynda Aýyl sharýashylyǵy mınıstri Aıdarbek Saparov málimdedi.
