15 jyl kútken baspanamyz úmitti aqtamady - Petropavl turǵyndary qaýipti úıde turyp jatyr
PETROPAVL. KAZINFORM – Petropavldaǵy Baıbolov kóshesi, 51-úıdiń turǵyndary jyldar boıy kútken páterleriniń qazirgi jaǵdaıy adam ómirine qolaısyz ári apatty kúıde ekenin aıtyp, shaǵymdandy.

Petropavldaǵy bul jaldamaly-kommýnaldyq úı 2023 jyldyń jeltoqsan aıynda paıdalanýǵa berilgenimen turǵyndar tek bir jarym aıdan keıin ǵana qonystana bastaǵan.
Úıde 100 páter bar, munda jetim balalar, múgedekter, kópbalaly analar, jalǵyzbasty analar jáne zeınetkerler sııaqty áleýmettik az qamtylǵan sanatyndaǵylar turady.
— 13 jyl páterge kezekte turdyq. Kópten kútken baspana berilgende qalaı qýanǵanymyzdy sózben aıtyp jetkize almaımyn, biraq bul qýanysh uzaqqa barmady. Úıimiz apatty jaǵdaıda bolyp shyqty. Jertóle kárizdiń suıyqtyǵyna tolyp tur, saldarynan jaǵymsyz ıis tórtinshi qabatqa deıin seziledi. Biz sol jaman ıispen tynystaımyz. Balalar túnimen jótelip, uıyqtaı almaı shyǵady. Únemi kúızeliste ómir súrip kelemiz, — deıdi turǵyn Ksenııa Tytenok.
Turǵyndardyń sózinshe, 2024 jyldyń kókteminen beri jertóle káriz sýyna tolyp tur.
Ol suıyqtyq irgetasty buzyp jatyr, páterlerdi syz tartyp, jeldetý júıeleri arqyly masa men shirkeı kiredi.
Turǵyndar óz qarajatyna sanıtarııalyq-epıdemıologııalyq qyzmetti shaqyrǵan. Saraptama nátıjesi kóńil kónshitpedi: jertóle mańyndaǵy topyraqtan askarıda jumyrtqalary tabylǵan.
ıAǵnı las sý tek jórtelege jınalmaı, syrtqa da shyǵyp jatyr, bul juqpaly aýrýlardyń taralýyna sebep bolýy múmkin.
— PIK múldem áreket etpeıdi. Bizdiń jaryq pen jylý úshin jeke shotymyz joq, keıin bul qaryzdy bizge artyp qoıýy múmkin. Biz aı saıyn jalǵa alý aqysyn, kommýnaldyq tólemderdi tólep otyrmyz. Máseleni aıtyp jatyrmyz, biraq eshkim jaýap bermeıdi, bir-birine silteıdi. Bir ret kelip, sýdy soryp alyp ketti — sonymen bitti. Biraq sý qaıtadan jınalady. Ákimdik jaýapkershilikti merdigerlerge artady. Al bizdiń qandaı kinámiz bar, nelikten qorqynyshta, osyndaı qaýipti jaǵdaıda ómir súrýimiz kerek? — deıdi turǵyndar.

Bul úıdegi másele jalǵyz jertólemen shektelmeıdi. Ǵımarattyń basqa da aqaýlary jetip artylady.
Turǵyndardyń aıtýynsha, shatyrdan sý ótedi, kósheniń jaryǵy joq, jańbyr sýyn aǵyzatyn júıe qarastyrylmaǵan, trotýarlar men kólik turaǵy múlde joq.
Qar erigende nemese jańbyr jaýsa, turǵyndarǵa úıge jetý muń. Qoqys jáshikteri qorshalmaǵan, úıdiń ishin zeń basqan.

— Biz bul páterlerdi tegin alǵan joqpyz. Kezekte jyldar boıy turdyq, jaldaý aqysyn da, kommýnaldyq tólemderdi de tólep jatyrmyz. Biraq bizdi adam qurly kórmeıdi. Bul úıde qazirgideı jaǵdaıda turý densaýlyqqa ǵana emes, ómirge qaýipti. Al áreket etýge tıis organdar únsiz otyr, — deıdi turǵyn Zarına Pıvnıak.
Turǵyndardyń aıtýynsha, irgetas qazirdiń ózinde úgitilip, búlinip jatyr. Eger másele sheshilmese, qaıǵyly jaǵdaı oryn alýy ábden múmkin.
Turǵyndar ákimdikke, PIK-ke jáne merdigerlerge júginip, barlyq kemshilikterdi shuǵyl túrde joıýdy nemese qaýipsiz turǵyn úıge kóshirýdi surap otyr.

— Biz qoryqpaı ómir súrgimiz keledi. Bul — erikkenniń ermegi emes, balalarymyzdyń amandyǵy úshin kúres, — deıdi turǵyndar.
Qalalyq ákimdiktiń baspasóz qyzmetiniń habarlaýynsha, bul úı Petropavl ákimdigine qarasty turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń balansynda tur.
— Byltyr eki sorǵy kepildik aıasynda aýystyryldy. Sondaı-aq «Turǵyn úı qyzmeti» JShS úıdiń jertólesinde dezınfektsııa júrgizdi. Úıdiń mańynda abattandyrý jumysy aıaqtalmaǵan edi, bıyl bul jumys aýa raıy durystalǵasyn jalǵasady, — deıdi Petropavl qalasy ákiminiń baspasóz hatshysy Ásem Aıtýlova.
Kazinform bul oqıǵanyń barysyn nazarda ustaıtyn bolady.
Buǵan deıin Petropavldaǵy jańa emhana jabylmaıtynyn jazǵan edik.