15 jastaǵy qaraǵandylyq polıatlonnan álem chempıony boldy
QARAǴANDY. QazAqparat - 11-15 sáýir aralyǵynda Belarýstiń Mogılev qalasynda polıatlonnan barlyq jas sanattary arasynda jabyq keshendegi álem chempıonaty ótti. Bul týraly Qaraǵandy oblystyq deneshynyqtyrý jáne sport basqarmasy málimdedi, dep habarlaıdy QazAqparat.
Jarysqa Belarýs, Reseı, Qazaqstan, Úndistan, Ýganda, Gana, Kenııa, Estonııa jáne Nıgerııadan 200-den astam sportshy qatysty.
Alǵashqy kúni pnevmatıkalyq vıntovkadan oq atý, ekinshi kúni júzý (erkin ádispen 50 metrden 100 metrge deıin), úshinshi kúni 60 metrge sprınttik jarys, tórtinshi kúni alysqa júgirý (1000 metrden 2000 metrge deıin) sportynan jarystar boldy.
Qaraǵandy oblysynan bir sportshy - Gleb Sobolev bardy. Ol 14-15 jastaǵylar sanatynda birinshi oryndy jeńip aldy. Bolashaǵynan úmit kúttirgen daryn ıesin Shırokova Galına Vıktorovna jattyqtyrady.
Jalpy, osy týrnırde jaqsy óner kórsetken Qazaqstan quramasy komandalyq esepte ekinshi oryndy ıelendi.
