15 jastaǵy sportshy jarysta moıyn omyrtqasyn syndyryp, aýyr halde aýrýhanaǵa tústi

ASTANA. KAZINFORM — Aqtóbelik 15 jastaǵy jasóspirim Aqmola oblysyndaǵy jarysta aýyr jaraqat aldy. Aqmolalyq dárigerler sportshynyń jaǵdaıyn aýyr dep baǵalap otyr. Bala sanıtarlyq avıatsııa kómegimen Astanaǵa jetkizildi, dep habarlaıdy Kazinform tilshisi.

Qaıǵyly oqıǵa 7 qyrkúıekte Aqmola oblysy Ereımentaý aýdanynda ótken 2010–2011 jyly týǵan jasóspirimder arasyndaǵy H dástúrli halyqaralyq týrnır kezinde boldy. Týrnır Alash ıdeıasy jolynda janyn qıǵan qaıratkerler men Perýash Kárimulynyń rýhyna arnaldy.

Aqmola oblysynyń dene shynyqtyrý jáne sport basqarmasynyń málimetinshe, 50 kg deıingi salmaq dárejesinde beldesken, «Birinshi sport sheberligi sanatyna ıe» tájirıbeli aqtóbelik balýan kúres ádisin oryndaý kezinde moıyn omyrtqasynan aýyr jaraqat alyp, esinen tanyp qalǵan.

— Barlyq qatysýshy komandalar jarysqa deıin sportshylardyń densaýlyǵy týraly medıtsınalyq anyqtamalar usynǵan. Týrnır barlyq resmı ereje men qaýipsizdik talaptaryna saı ótti, jarys kezinde jedel járdem brıgadasy kezekshilikte boldy, — delingen basqarma taratqan málimette.

Aqmola oblystyq densaýlyq saqtaý basqarmasynyń habarlaýynsha, jarys kezinde kezekshi dáriger jáne jedel járdem brıgadasy ýaqtyly jetken.

— Alǵashqy tekserý kezinde 2010 jyly týǵan bala esi joq, klınıkalyq ólim jaǵdaıynda bolǵan. Oqıǵa ornynda reanımatsııalyq kómek kórsetildi. Keıin aýdandyq aýrýhanaǵa shuǵyl jetkizilip, onda júrekke janama massaj, adrenalın, defıbrıllıatsııa jasalyp, júrek soǵysy qalpyna keltirildi. Bala jasandy tynys alý apparatyna qosyldy, — dedi basqarmada.

Alǵashqy boljam boıynsha dıagnoz — moıyn omyrtqalarynyń synýy.

Oqıǵa ornynda Ereımentaý aýdandyq dárigerleri, sanıtarlyq avıatsııa, ulttyq úılestirý ortalyǵy jáne Astana qalasynyń medıtsına mamandary birlese jumys istedi.

— Sol kúni saǵat tórtter shamasynda bala Astanadaǵy № 2 kópbeıindi aýrýhanaǵa jetkizildi. Telemedıtsınalyq keńes ótkizilip, dárigerler balany sanıtarlyq avıatsııa arqyly tasymaldaý týraly sheshim qabyldady. Jas sportshy tikushaqpen Astanaǵa jetkizildi. Qazir onyń jaǵdaıy óte aýyr, — dedi oblystyq densaýlyq saqtaý basqarmasy.

Aqmola oblystyq polıtsııa departamentiniń baspasóz qyzmeti habarlaǵandaı, bul oqıǵa boıynsha qylmystyq is qozǵaldy, aldyn ala tergeý júrip jatyr.

«Qazaq Kuresi» qaýymdastyǵynyń prezıdenti Damır Bekbosynovtyń aıtýynsha, jas sportshyǵa barlyq qajetti kómek kórsetilip jatyr. Qaýymdastyq bapkerlermen jáne medıtsınalyq mekemelermen turaqty baılanysta.

Budan buryn Shymkentte jaraqat alǵan frantsııalyq boksshyǵa qalada shuǵyl ota jasalǵanyn jazǵanbyz.