15 jastaǵy oqýshynyń júkti bolýy oqıǵasy boıynsha tergeý bastaldy — Juldyz Súleımenova

ASTANA. KAZINFORM — Oqý-aǵartý mınıstri Juldyz Súleımenova Aqtóbe jáne Túrkistan oblystarynda oqýshy qyzdardyń júkti bolýy oqıǵalaryna qatysty pikir aıtty. 

— Qazir tergeý amaldary júrip jatyr. Árıne, bul ókinishti jaǵdaı. Erte júktilik máselesi búginde ózekti problemanyń biri. Qazirgi kezde mektepterde akýsher-gınekolog degen maman joq. Sondyqtan osyny qaıtarý boıynsha Densaýlyq saqtaý mınıstrligimen júıeli jumysty bastadyq, — dedi Juldyz Súleımenova Parlament Májilisinde tilshiler suraǵyna jaýap bere otyryp.

Mınıstrdiń aıtýynsha, bul balalar jaıynda aqparat keńinen tarap ketkennen keıin, psıhologııalyq aýyr jaǵdaıǵa dýshar bolǵan.

— Qazir oqýshynyń bilim alýyn ary qaraı jalǵastyrýyna jaǵdaı jasaýǵa mindettimiz. Psıhologııalyq kómek te jasalyp jatyr. Tergeý amaldary aıaqtalmaıynsha budan basqa málimetti jarııalaı almaımyz, — dedi vedomstvo basshysy.

Sonymen qatar ol Túrkistan oblysynda 71 jastaǵy týysynan júkti bolyp, bosanǵan 15 jastaǵy qyzdyń jaǵdaıyna qatysty tergeý bastalǵanyn aıtty.

Eske salsaq, osyǵan deıin Aqtóbede oqýshy qyz bosanǵannan keıin qylmystyq is qozǵaldy. 

Budan bólek, jaqynda Túrkistan oblysynda 15 jasar qyz 71 jastaǵy týysynan júkti bolyp qalǵanyn jazǵan edik.