15 jastaǵy kelin: Qaraǵandyda eldi dúr silkindirgen is boıynsha úkim shyqty

QARAǴANDY. KAZINFORM — Qaraǵandy oblysynda kámeletke tolmaǵan qyzǵa qatysty qylmystyq is boıynsha sot úkimi shyqty. Er adam 17 jylǵa bas bostandyǵynan aıyryldy, al prokýratýraǵa oqıǵaǵa jol bergen eresekterdiń áreketin zań turǵysynan tekserý tapsyryldy. 

Qaraǵandy oblysynyń qylmystyq ister jónindegi mamandandyrylǵan aýdanaralyq sotynda kópshiliktiń nazaryn aýdarǵan is qaraldy. Aıyptalýshy, 37 jastaǵy er adam kámeletke tolmaǵan qyzǵa qatysty aýyr qylmys jasady dep tanyldy.

Іs materıaldaryna sáıkes, jyldyń basynda Abaı qalasynyń turǵyndary qyzdyń anasy men ógeı ákesi, ony er adamǵa turmysqa shyǵýǵa kóndirmek bolǵan. Qyzdyń qarsy bolýyna qaramastan, ógeı ákesi ony sol er adammen birge Qaraǵandyǵa jibergen. 

Memlekettik aıyptaýshy sottan aıyptalýshyǵa eń joǵarǵy jaza 17 jyl bas bostandyǵynan aıyrýdy surady. Qorǵaýshy tarap, kerisinshe, isti jeńildetilgen bap boıynsha qaraýdy ótingen. Sot isti jan-jaqty qarap, aıyptalýshynyń kinási tolyq dáleldengen dep sheshti.

Sot úkimimen er adam 17 jylǵa bas bostandyǵynan aıyryldy. Sondaı-aq, oǵan ómir boıyna bilim berý jáne kámeletke tolmaǵandarmen jumys isteý salasynda eńbek etýge tyıym salyndy.

Budan bólek, sot prokýratýra atyna jeke uıǵarym shyǵaryp, jábirlenýshiniń anasy men ógeı ákesiniń áreketterin tekserýdi tapsyrdy, olardyń zańdy buzý belgileri bar-joǵy anyqtalatyn bolady.

Úkim áli zańdy kúshine engen joq.