15 jastaǵy kelin: Qaraǵandyda eldi dúr silkindirgen is boıynsha sot bastaldy
QARAǴANDY. KAZINFORM — Qaraǵandyda 38 jastaǵy er adamnyń 15 jastaǵy mektep oqýshysymen «neke qııýyna» baılanysty rezonansty qylmystyq is boıynsha jabyq sot protsesi bastaldy. Aıyptalýshyǵa kámeletke tolmaǵandy zorlaý baby boıynsha is qozǵalyp, oǵan 15 jyldan 17 jylǵa deıin bas bostandyǵynan aıyrý jazasy qarastyrylyp otyr.
Oqıǵa bıyl naýryz aıynda Abaı qalasynda bolǵan. Tergeý derekterine sáıkes, jasóspirimniń anasy men ógeı ákesi ony dinı rásim arqyly otbasy bolyp aralasyp júrgen dosyna uzatqan. Qyz birneshe kún «kúıeýiniń» qolynda bolyp, zorlyq kórgenin aıtqan. Keıin ol qashyp, týǵan ákesine baryp, ol birden quqyq qorǵaý organdaryna júgingen.
Búginde aıyptalýshylar oryndyǵynda tek 38 jastaǵy kúdikti otyr. Degenmen, qyzdyń ákesi qylmystyq jaýapkershilikke tek ony ǵana emes, «nekege» kelisim bergen anasy men ógeı ákesin de tartýdy talap etip otyr.
— Burynǵy áıelim men onyń kúıeýi is boıynsha tek kýáger retinde qatysyp otyr. Biraq olar qyzymdy óz qoldarymen 40-qa taıaǵan dosyna uzatty. Bul jaı qatelik emes, bul — qylmystyq sybaılastyq. Olar qyzymnyń ómirin talqandady, al qazir sot zalynda jaı ǵana kýáger bolyp otyr, — deıdi ol.
Ákesi jazda jergilikti prokýratýraǵa resmı saýal joldaǵanymen, shildeden beri jaýap almaǵanyn aıtady. Osyǵan baılanysty qyrkúıek aıynda ol Qazaqstan Respýblıkasynyń Bas prokýratýrasyna shaǵym túsirip, kúdiktimen birge anasy men ógeı ákesiniń de jaýapqa tartylýyn talap etti.
Ótinishpen birge ol birneshe dálel tapsyrdy: qazaq tilinde balanyń ájesi qyzdy uzatýǵa úgittegen aýdıojazbasyn, sondaı-aq anasy men ógeı ákesiniń qyzyn «buzylǵan» dep aıyptap, balaǵattaǵan sáti jazylǵan beınematerıaldy joldady.
Buǵan deıin qamqorshylyq organdary anasy men onyń jubaıyn ata-ana quqyǵynan aıyrý týraly sotqa talap qoıǵan. Alaıda sot otbasynda eki bala baryn jáne áıeldiń úshinshi balaǵa aıaǵy aýyr ekenin eskerip, talap-aryzdy qanaǵattandyrmaǵan.
Ákesiniń pikirinshe, bul sheshim ádiletsiz, sondyqtan ol isti qaıta qaraýdy talap etip otyr.
Shýly oqıǵa óńirde úlken qoǵamdyq pikirtalas týdyrdy. Quqyq qorǵaýshylar balalardyń quqyǵyn qorǵaý men ata-analardyń jaýapkershiligin kúsheıtý máselesin kóterse, zańgerler mundaı jaǵdaılardyń aldyn alý úshin isterdi jan-jaqty qaraý qajettigin alǵa tartyp otyr.