Azııa chempıonaty: 15 jastaǵy qazaqstandyq ziltemirshi 5 altyn aldy
ASTANA. KAZINFORM — 15 jastaǵy Snejana Qashqarova Ózbekstanda ótip jatqan Azııa chempıonatynda 5 altyn ıelendi, dep habarlaıdy Qazaqstannyń aýyr atletıka federatsııasynyń baspasóz qyzmeti.
Qazaqstandyq sportshy qyzdar Tashkentte ótip jatqan aýyr atletıkadan Azııa chempıonatynda barlyǵynan basym tústi. Ásirese, Snejana Qashqarova erekshe kózge tústi. 15 jastaǵy sportshy sátti óner kórsetip, 3 Azııa rekordyn jáne 3 álemdik rekordty jańartty:
- 88 kg — julqa kóterýde;
- 112 kg — serpe kóterýde;
- 200 kg — qos saıys nátıjesinde.
— Bul nátıje atalǵan jarystaǵy eń úzdik ári jarqyn kórsetkish boldy. Snejana 57 kg salmaq dárejesinde óner kórsetip, 5 altyn medal ıelendi. Ol 17 jasqa deıingi jáne 20 jasqa deıingi qyzdar arasynda Azııa qurlyǵynyń absolıýtti chempıony atandy, — delingen habarlamada.
Buǵan deıin qazaqstandyq ziltemirshi Petr Hrebtov Azııa chempıonatynda besinshi oryn alǵany belgili boldy.
