15 jasar jetkinshek Jaıyq ózeninen tasyǵan sýǵa batyp ketti
ATYRAÝ. KAZINFORM — Atyraý oblysynda 15 jasar jasóspirim Jaıyq ózeniniń jaıylmasyndaǵy sýǵa batyp ketti.
Bul derekti Atyraý oblystyq tótenshe jaǵdaılar departamentiniń qoǵammen baılanys toby rastady.
Tasqyn sý Inder aýdanynyń ortalyǵy — Inderbor kentiniń tusynda Jaıyq ózeninen jaıylmaǵa shyqqan.
Inderbor kentinde turatyn bir top jasóspirim 28 mamyrda kúndizgi ýaqytta sol sýǵa barǵan. Jasósirimder jaıylmadaǵy deńgeıi 170 sm bolatyn sýǵa shomylǵany anyqtaldy.
Biraq, 2009 jylǵy jasóspirim úıine keri oralmaǵan.
«Qutqarýshylar kesheden beri jasóspirimdi izdestirý jumysyn júrgizdi. Nátıjesinde 29 mamyrda túngi saǵat 04:40 shamasynda jasóspirimniń denesin sýdan shyǵaryp, polıtsııa qyzmetkerlerine tapsyrdy», — dep habarlady departamenttiń qoǵammen baılanys toby.
Osyǵan baılanysty qutqarýshylar sý tasqyny kezinde qaýipsizdik sharalaryn saqtap, jazǵy demalys ýaqytynda balalardy nazardan tys qaldyrmaýǵa shaqyryp otyr.
«Jaıyq ózeninde sý deńgeıi kóterildi. Sonyń saldarynan aǵyspen kelgen túrli qoqys, aǵash qaldyqtary jáne basqa zattar bar. Aǵys pen qaldyqtar adam ómirine qaýip ekenin esten shyǵarmaý qajet» -dep málim etti departamenttiń qoǵammen baılanys tobynan.
