15 jasar tennısshi Ańsar Nıetqalıev Qytaıdaǵy týrnırdiń fınalyna deıin jetti
ASTANA. KAZINFORM – Qazaqstandyq tennısshi Ańsar Nıetqalıev 18 jasqa deıingiler arasynda Ýhan (Qytaı) J100 týrnırinde sátti óner kórsetti.
Nebári 15 jasta bolǵanyna qaramastan, Ańsar ózinen jasy úlkendermen básekege qabilettiligin kórsete bildi.
Ańsar fınalda ǵana jarystyń 1-raketkasy, jergilikte tennısshi Tszıahý Hýmen kezdesti. A.Nıetqalıev tájirıbeli qarsylasyna eki sette ese jiberdi.
Budan bir aptadan sál astam ýaqyt buryn Ańsar Nıetqalıev Qytaıdyń Gýanchjoý qalasynda ITF World Tennis Tour Juniors (J60) týrnırinde úzdik shyqqan edi.
Taǵy bir qazaqstandyq, álemniń 198-raketkasy Tımofeı Skatov Shymkent chellendjer týrnıriniń fınalynda baq synady.
Jarystyń 1-raketkasy T.Skatov fınalda ATP reıtıngisinde 359-oryndaǵy ózbekstandyq Sergeı Fomınge shamasy kelmedi – 3:6, 5:7.
Shymkentte Denıs Evseev juptyq synda moldovalyq Radý Albotpen birge jartylaı fınalǵa deıin jetti. Olar jartylaı fınalda reseılik Svıatoslav Gýlın – amerıkalyq Dalı Blanshqa jol berdi – 4:6, 2:6.
Qazaqstannyń juptyq syndaǵy birinshi, álemniń 7-raketkasy Anna Danılınanyń Madrıd (Ispanııa) WTA 1000 týrnırinde joly bolmady.
A.Danılına osyǵan deıin serbııalyq Aleksandra Krýnıchpen birge baq synap kelgen edi.
Bul joly amerıkalyq Eıja Mýhammadpen birge jup quryp, jarystyń 5-raketkasy bolyp tirkelgen qazaqstandyq tennısshi alǵashqy aınalymda norvegııalyq Ýlrıkke Eıkerı — amerıkalyq Kaıla Glısonmen (AQSh) betpe-bet keldi. Qazaqstandyq-amerıkalyq dýet oısyraı jeńilip qaldy – 2:6, 1:6.
Eske sala keteıik, budan buryn 15 jastaǵy qazaqstandyq tennısshiniń Qytaıdaǵy týrnırde top jarǵanyn jazǵan bolatynbyz.
Sondaı-aq Elena Rybakına Madrıd týrnırin kambekpen bastady.
Jibek Qulambaeva Qytaıdaǵy jarystyń jeńimpazy atandy.
