15 jasar qyzdyń júktiligine qatysty tergeý qatań baqylaýda — Polıtsııa departamenti

TÚRKІSTAN. KAZINFORM — Keles aýdanyndaǵy 15 jasar qyzdyń bosanýyna qatysty Túrkistan oblysy Polıtsııa departamentiniń bastyǵy Murat Qabdenov pikir bildirdi. 

— 2025 jyldyń qys aıynda jas qyz Astana qalasynyń medıtsınalyq mekemesine júkti bolyp qaralyp, keıin bosanǵan. Osy fakt boıynsha qyzdyń ózi jáne anasy, onyń jas jigitimen ózara kelisim boıynsha baılanysta bolǵanyn aıtyp, tergeý barysyn jańylystyrǵany anyqtaldy, — dedi Murat Qabdenov.

Osylaısha olar aryz jazýdan jáne saraptama júrgizýden bas tartqan.

— Alaıda 12 qazanda jábirlenýshiniń anasy kúdikti retinde 70 jastaǵy týysyna qatysty aryz túsirip, quqyq qorǵaý organdaryna júgindi.  Osy fakti boıynsha Túrkistan oblysy PD Keles aýdandyq polıtsııa bólimi shuǵyl qylmystyq is qozǵap, kámeletke tolmaǵandarǵa qatysty quqyqqa qaıshy áreketter faktisi boıynsha sotqa deıingi tergeýdi bastady. Kúdikti qamaýǵa alyndy, — dep jazdy Polıtsııa departamentiniń bastyǵy.

Qazirgi ýaqytta tergeý jalǵasyp jatyr.

Murat Qabdenov tergeý áreketteriniń barysyn qatań baqylaýǵa alǵanyn aıtty.

Eske sala keteıik, búgin QR Bala quqyqtary jónindegi ýákil Dınara Zakıeva osy daýly oqıǵaǵa qatysty pikir bildirgen bolatyn.

Artynsha Oqý-aǵartý mınıstri Juldyz Súleımenova osy iske qatysty tergeý bastalǵanyn málimdedi.