15 jasar qazaqstandyq aýyr atlet álem chempıonatynda kúmis júldeger atandy
NUR-SULTAN. QazAqparat – Qazaqstandyq Nadejda Lı Meksıkanyń Leon qalasynda aýyr atletıkadan jasóspirimder arasynda ótip jatqan álem chempıonatynyń kúmis júldegeri atandy, dep habarlaıdy QazAqparat tilshisi.
Sports.kz saıtynan alynǵan málimetke qaraǵanda, 15 jasar Nadejda Lı 64 kelige deıingi salmaqta óner kórsetti.
Qazaqstandyq sportshy qossaıys qorytyndysynda 190 kılogramm jınady (85+105).
Altyn júlde 211 kılogramdy (94+117) baǵyndyrǵan kolýmbııalyq Ingrıd Segýra Grýesonyń qanjyǵasynda ketti.
Venesýelalyq Karolına Sılva Fernandes 187 kg (84+103) nátıjemen úzdik úshtikke ilikti.
Meksıkadaǵy álemdik doda 18 maýsymǵa deıin jalǵasady.
Eske sala keteıik, budan buryn aýyr atlet Erasyl Sáýlebekovtiń jasóspirimder arasynda álem chempıony atanǵanyn jazǵan bolatynbyz.
Sondaı-aq qazaqstandyq aýyr atletter álem chempıonatynda taǵy eki altyn medal jeńip aldy.
