15 jasar Aleksandr Ten - trıatlonnan Azııa chempıony
ALMATY. QazAqparat - Ońtústik Koreıanyń Kendjý qalasynda trıatlonnan Azııa chempıonatynyń úshinshi kúni máresine jetti. Onyń qorytyndysy boıynsha almatylyq Aleksandr Ten jeńimpaz atandy, dep habarlaıdy QazAqparat.
Almatydaǵy trıatlon federatsııasy baspasóz qyzmetiniń málimetinshe, Aleksandr Ten «sýpersprınt» (400 m júzý, 10 km velojarys jáne 2,5 km júgirý) qashyqtyǵyndaǵy asa kúrdeli birinshilikte «altyn» medal jeńip alǵan. Almaty Triathlon Federation tárbıelenýshisi júzý baǵdarlamasyn kósh basynda aıaqtady. Sosyn veloqashyqtyqta Gonkong jáne Ońtústik Koreıadan kelgen atlettermen birge qara úzip, basqalardan oq boıy ozyp ketti. Al sońǵy júgirý satysynda 15 jasar chempıon ońtústikkoreıalyq qarsylasynan jeńisti julyp aldy.
Trıatlonnan Azııa chempıonaty aıaqtaldy. Kendjýda Qazaqstannyń týy eki ret jelbiredi. Bizdiń quramanyń qanjyǵasynda eki altyn, eki qola medal bar. Chempıonat qorytyndysy boıynsha Qazaqstan resmı emes jalpykomandalyq medal esebinde ekinshi orynda tur.
