15 jambyldyq stýdent kelesi oqý jylynda Ońtústik Koreıada oqýy múmkin
ASTANA. QazAqparat - 15 jambyldyq stýdent kelesi oqý jylynda Ońtústik Koreıa memleketinde oqýy múmkin. Búgin Óńirlik kommýnıkatsııalar qyzmetinde ótken brıfıngige qatysqan Taraz ınnovatsııalyq-gýmanıtarlyq ýnıversıtetiniń rektory Erbolat Saýryqov osylaı málimdedi.
Erbolat Saýryqovtyń aıtýynsha, Taraz ınnovatsııalyq-gýmanıtarlyq ýnıversıteti 2014-2015 oqý jylynda josparly memlekettik attestattaýdan ótip, QR Bilim jáne ǵylym mınıstrligi janyndaǵy bilim salasyndaǵy baqylaý komıtetiniń buıryǵymen 23 bakalavr jáne 10 magıstratýra mamandyqtary boıynsha bilim berý qyzmetin júrgizip keledi. Ýnıversıtet professor-oqytýshylarynyń ǵylymı áleýeti joǵary.
Stýdentterge 20-ǵa jýyq ǵylym doktory, 80-nen astam ǵylym kandıdaty, QR bilim berý isiniń qurmetti qyzmetkerleri, Y.Altynsarın tósbelgisiniń ıegerleri, «Joǵary oqý ornynyń úzdik oqytýshysy» konkýrsynyń jeńimpazdary sapaly bilim berýde.
QR Bilim jáne ǵylym mınıstriligimen bekitilgen 2011 jylǵa arnalǵan kredıttik oqý tehnologııasyn jetildirý josparynda Bolon úderisin iske asyrý aıasynda oqytýshylar men stýdentterdiń akademııalyq utqyrlyǵyn damytýǵa kóp kóńil bólinýde.
Akademııalyq áriptestikti jetildirýge múddeli otandyq ýnıversıtetterdiń qatary artyp keledi. Sondaı-aq, Germanııa, Malaızııa, Qytaı, Ońtústik Koreıa, Ulybrıtanııa, Japonııa, Reseı, Túrkııa, Latvııa, Qyrǵyzstan, Ózbekstan jáne t.b. memlekettermen joǵary jáne joǵary oqý ornynan keıingi bilim berý sheńberinde áriptestik týraly kelisimsharttar jasalyp, ortaq bilim berý qyzmeti júrgizilýde. Atap aıtatyn bolsaq, osyndaı ortaq maqsat aıasynda 30-dan astam stýdent atalǵan joǵary oqý oryndarynda óz bilimin jetildirýge múmkindik aldy.
Ýnıversıtette oqytylatyn koreı tiliniń mamandary arnaıy shaqyrtylyp, baspanamen qamtyldy. Búgingi tańda 15 stýdent koreı tilin meńgerip, kelesi oqý jyldarynda Ońtústik Koreı memleketine joldamamen barý múmkindigine ıe bolady.
Ýnıversıtet professor-oqytýshylary Qytaı memleketiniń joǵary oqý oryndarynda is-saparda bolyp, bilim men ǵylymdy ınnovatsııalaý boıynsha tájirıbe jınaqtaýǵa, ǵylymı-zertteý jumystarynyń nátıjelerin shet memleketterde jarııalaýǵa múmkindikter alýda.
«Sonymen qatar, 6 ǵylymı baǵyttaǵy granttyq jumystar «UǴTAO» AQ-da tirkelip, atqarylýda. Nátıjesinde byltyr 400-den astam ǵylymı maqalalar jarııalandy. Onyń 58-i shetel baspalarynda shyqty. Sonymen qatar, shet memleketterdiń JOO-da ýnıversıtettiń professor-oqytýshylar quramy biliktiligin kóterip, tájirıbe almasý dástúrge aınalǵan.
Ýnıversıtet kásiptik qyzmeti men áleýmettik-ekonomıkalyq jetistikteri úshin Frantsııanyń Kann qalasyndaǵy Halyqaralyq Іsker Keńesi (HІK) men Jenevada ornalasqan «Bıznes jáne basqarý» INSAM ınstıtýty qorynyń sheshimimen joǵary deńgeıdegi is - tájirıbeleri men jetistikteri úshin «Evropalyq grant» nomınatsııasy boıynsha arnaýly syılyqty ıelengen», - dep málimdedi E.Saýryqov.
