15 tomdyq «Qazaq ádebı tiliniń sózdigi» 10 myń danamen jaryq kórdi

Búgin osyǵan oraı elordadaǵy Ulttyq akademııalyq kitaphanada basylymnyń tusaýkeseri ótti.

QR mádenıet vıtse-mınıstri Ǵazız Telebaıdyń atap ótýinshe, sózdikte 92300 sóz ben 57 856 sóz tirkesi, jalpy 150 156 leksıkalyq birlik qamtylyp, leksıkografııalyq saralaýdyń barysynda 166 myńnan astam sózdiń maǵynasy ashyp kórsetilgen.

«Munda jurtshylyqtyń bári birdeı jalpy qoldanystaǵy zat, qubylys, ýaqıǵa ataýlary, adamnyń ár alýan sezim kúılerin beıneleıtin sózder, sýbektıvti mándi baǵalaýshylar syndy ádebı til aıasyndaǵy leksıka-frazeologııalyq birlikter sóztizbede qamtylǵan. Jalpyhalyqtyq tilde qoldanyla bermeıtin termın sózder, kásibı sózder, jergilik sózder toby saralanyp, iriktelinip alǵan. Sonymen qatar medıtsına, qarjy, naryq ekonomıkasy, quqyqtaný salalarynyń termınderi de engizilgen», - dedi ol.

Sózdikte 20 myńǵa jýyq ártúrli tıptegi anyqtama berilip, 600 myńǵa jýyq dáıeksózden turatyn dáıektemelik qor jınaqtalǵan. Oǵan qosa ǵylym-bilim salasynda qoldanylatyn ataýlar da berilgen.

Jalpy, 15 tomdyq «Qazaq ádebı tiliniń sózdigi» kópshilik qaýymǵa, atap aıtqanda, baspasóz, ǵylym, bilim, mádenıet, oqý-aǵartý qyzmetkerlerine, ana tilin tereńirek bilsem, qazaq tilin úırensem degen jurtshylyqqa arnalǵan.

QR Mádenıet mınıstrligi Til komıtetiniń tóraǵasy Sherýbaı Qurmanbaıulynyń atap ótýinshe, 10 myń danamen jaryq kórgen basylym respýblıkanyń barlyq oblystaryndaǵy bilim mekemelerine, kitaphanalarǵa tegin taratyldy.