15 tomdyq «Qazaq ádebı tili sózdiginiń» tusaýkeseri ótedi
ASTANA. 22 jeltoqsan. QazAqparat /Qanat Mámetqazyuly/ - Erteń, 23 jeltoqsanda QR Mádenıet mınıstrliginiń Til komıteti 10 000 danamen shyǵarylǵan 15 tomdyq «Qazaq ádebı tili sózdiginiń» tusaýkeser rásimin ótkizedi.
Sózdik Qazaqstannyń tarıhynda alǵash ret shyǵarylyp otyr. Buǵan deıin 30 jyl buryn qazaq tiliniń 10 tomdyq túsindirme sózdigi shyqqanyn eskersek, sózdiktiń elimizdiń mádenı-rýhanı ómirindegi mańyzdylyǵy aıryqsha. Sózdikte barlyǵy 150 156 leksıkalyq birlik qamtylyp, leksıkografııalyq saralaýdyń barysynda 166 myńnan astam sózdiń maǵynasy ashyp kórsetilgen. Munda jurtshylyqtyń bárine birdeı jalpy qoldanystaǵy zat, qubylys, oqıǵa ataýlary, adamnyń ár alýan sezim kúılerin beıneleıtin sózder, sýbektıvti mándi baǵalaýyshtar, t.b. ádebı til aıasyndaǵy leksıka-frazeologııalyq birlikter sóztizbede qamtylyp, jalpyhalyqtyq tilde qoldanyla bermeıtin termın sózder, kásibı sózder, jergilikti sózder toby saralanyp, iriktelip alynǵan. Sonymen qatar medıtsına, qarjy, naryq ekonomıkasy, quqyqtaný salalardyń termınderi de engizilgen.
Tusaýkeser rásimine belgili tilshi-ǵalymdar, termınologııa salasyndaǵy mamandar, qoǵam qaıratkerleri, jazýshylar, til janashyrlary qatysady.
Sózdik on myń danamen shyǵarylyp, respýblıkanyń barlyq oblystaryndaǵy bilim mekemeleri men kitaphanalarǵa tegin taratylǵaly otyr.
