15 tamyzda «Dala daýysy» ІІІ halyqaralyq radıofestıvali bastaý alady

ASTANA. QazAqparat - 15 tamyzda Qazaq radıosynyń efırinde ár jyldardaǵy qazaq ániniń "Dala daýysy" ІІІ Halyqaralyq radıofestıvali bastaý alady. Ol týraly «Qazaqstan» respýblıkalyq teleradıokorporatsııasynyń baspasóz qyzmeti habarlady.

«Dala daýysy» - mýzyka arqyly qazaq tilin dúnıejúzi elderi arasynda nasıhattaıtyn Qazaqstandaǵy birinshi radıofestıval. Festıvalǵa qatysýshy shet eldik úmitkerge qazaq ánin oryndaý nemese óz halqynyń ánin qazaq tilinde oryndaý talaby qoıylǵan. Ondaǵy maqsat - qazaq ánin shet eldikterge oryndatý arqyly ulttyq mýzykalyq jáne poetıkalyq tildi nasıhattaý, sińirý.

Bul jyly efırdegi aptalyq kúndelikti festıvaldiń dırektory Mahat Sadyq ashyp, joba prodıýseri Aınur Abaıqyzy júrgizedi. 2012 jyldan bastaý alǵan radıofestıvaldiń negizgi maqsaty - qazaq ániniń zamanýı básekege qabiletti tóltýmalyq dybysyn nasıhattaý, jyldyń úzdik ánderin anyqtaý jáne jańa talanttardy tabý bolyp tabylady.

«Dala daýysy» - tek qana radıofestıval emes, bedeldi mýzykalyq sherý. Qazaq radıosynyń mıllıondaǵan tyńdarmandary ınternet arqyly kazradio.kz/kz/programs/dala-dauysy súıikti ánderine daýys berip, jeńimpazdardy anyqtaıdy. 2012 jylǵy birinshi "Dala daýysyna" eki myńdaı adam saıt arqyly daýys berse, 2013 jyly 54 memleketten mıllıonǵa jýyq tyńdarman daýys bergen. Ótken 2 jylda halyqaralyq "Dala daýysy" radıofestıvaline Qazaqstan, Túrkııa, Qytaı, Mońǵolııa, Reseı, Qyrǵyzstannan 200-den astam ánshi qatysyp, laýret atandy.

Bıylǵy "Dala daýysyna" qatysýǵa nıet bildirgen oryndaýshylardyń qatarynda: Reseı, Armenııa, Germanııa, Ýkraına, Koreıa, Qyrǵyzstan memleketterimen qatar, otandyq juldyzdardan: Marjan Arapbaeva, Qaırat Baekenov jáne "Format" toby, "Melomen", "Rıngo", "Zaman", "Nur-Muqasan", "Tartý", Qurmash Mahanov, Shahırızat Seıdahmet syndy úmitkerler jáne siz estimegen jańa daýystar bar. Joba uıymdastyrýshylarynyń jospary boıynsha, qatysýǵa nıet bildirgen 100 oryndaýshydan 20 ánshi "Dala daýysy" ІІІ Halyqaralyq radıofestıvaliniń laýreaty atanbaq. Jeńimpazdardy saltanatty marapattaý keshi 28 qarasha kúni "Qazmedıa ortalyq kıno-kontsert zalynda" ótkiziledi.

Radıofestıval jeńimpazdary «Dástúrli oryndaýshy», «Akademııalyq oryndaýshy», «Estradalyq oryndaýshy» atalymdary boıynsha marapattalyp, festıvaldiń «Jańa esimderi» anyqtalyp, olarǵa «Dala daýysynyń» arnaıy statýetkasy men arnaıy dıplomyn elimizdiń óner jáne mádenıet, qoǵam qaıratkerleri tabystaıdy.

15 tamyzdan bastap, budan keıin ár beısenbi saıyn saǵat 19.00-de «Qazaq radıosynyń» efırinde júrgiziletin "Dala daýysy kúndeliginde" aptalyq qorytyndylar kórsetkishi jarııalanyp, tyńdaýshy talǵamy arqyly alǵashqy bestikten kóringen bes shyǵarma fınalǵa ótedi. Efırde án jáne ánshige mýzykatanýshylyq baǵyttaǵy sarapshylyq baǵa berilip, pikirler bildiriledi.

Qazaq radıosy, «Dala daýysy» Halyqaralyq radıofestıvaliniń uıymdastyrý komıtetiniń baılanys telefondary: +7 (7172) 553253, email: daladauysy@mail.ru,wwwkazradio.kz .

«Qazaqstan» Respýblıkalyq teleradıokorporatsııasy «Qazaqstan» Ulttyq telearnasyn, «Balapan»jáne «KAZsport» arnalaryn, Qazaq radıosyn, «Shalqar», «Astana», «Classic» radıolary men aımaqtyq teleradıokompanııalardy biriktiredi. Korporatsııanyń resmı saıty www.kaztrk.kz . Korporatsııanyń áleýmettik jelilerdegi paraqshalary: facebook.com/Kaztrk.kz , twitter.com/kaztrk_kz , youtube.com/user/NTKKazakhstan