15 tamyzda Taıaý Shyǵysta bolǵan oqıǵalarǵa sholý
ASTANA. KAZINFORM – Qatar astanasynda halyqaralyq bitimgerler arqyly Izraıl men palestınalyq HAMAS toby arasynda ýaǵdalastyqqa kelý jóninde kelissóz bastaldy. Palestına prezıdenti Mahmýd Abbas Túrkııa parlamentinde sóz sóıledi, al Aq úı Irannyń Izraılge shabýyly eshqandaı eskertýsiz bolýy múmkin ekenin aıtty. 15 tamyz kúni bolǵan osy jáne basqa da oqıǵalardy kópshilik nazaryna usynamyz.
Amerıkalyq Axios basylymy AQSh-taǵy eki derekkózge silteme jasap habarlaǵandaı, Respýblıkalyq partııadan prezıdenttikke úmitker Donald Tramp sársenbi kúni Izraıl premer-mınıstri Bınıamın Netanıahýmen telefon arqyly sóılesip, Gaza sektoryndaǵy atysty toqtatý kelisimin talqylady. Keıinirek Netanıahý keńsesi osyndaı pikiralmasý bolǵanyn joqqa shyǵardy.
Nablýs qalasyna jaqyn mańdaǵy Balata lagerine Izraıldiń ushqyshsyz basqarylatyn ushaǵy jasaǵan soqqydan eki palestınalyq qaza taýyp, tórteýi jaralandy. TsAHAL-dyń habarlaýynsha, áskerıler osy aımaqta lańkestikke qarsy operatsııa júrgizgen.
The New York Times gazeti AQSh Ortalyq qolbasshylyǵynyń burynǵy basshysy general Djozef L.Voteldiń pikirin jarııalaǵan. Áskerı mamannyń aıtýynsha, Izraıl Gaza sektorynda HAMAS-qa qarsy áskerı turǵyda qolynan kelgenniń bárin jasap úlgerdi. Sondyqtan palestınalyq top aýqymdy is-qımylyn júzege asyra almaıtyn jaǵdaıda.
Izraıl áskeri sońǵy táýlikte Gaza sektorynda HAMAS-tyń 30-dan astam nysanyna áýeden soqqy jasalǵanyn habarlady. TsAHAL-dyń málimdeýinshe, bir aptada saperler HAMAS tobynyń 50-den astam jerasty jolyn joıdy.
«Hezbolla» Izraıldiń soltústigine qaraı 25-ten astam zymyran men ushqyshsyz basqarylatyn ushaq baǵyttaǵan. Bul zymyrandardan zardap shekkenderdiń bolmaǵany habarlandy. Olardyń kóbisin Izraıldiń qorǵanys kúshi joıǵan.
Qatar astanasy Dohada AQSh, Qatar jáne Mysyrdyń atsalysýy arqyly Gaza sektorynda atysty toqtatýǵa jáne kepilge alynǵandardy bosatýǵa baǵyttalǵan kelissózder bastaldy. Oǵan Izraıl «Mossad» basshysy Devıd Barnea, ShABAK qaýipsizdik qyzmetiniń basshysy Ronen Bar jáne armııa ókili Nıtsan Alon sııaqty qyzmetkerler engen delegatsııany jiberdi.
Kelissózderge AQSh Ortalyq barlaý basqarmasynyń dırektory Ýılıam Berns, Mysyr barlaý qyzmetiniń basshysy Abbas Kamel jáne Qatar premer-mınıstri sheıh Muhammed ben Abdýlrahman Ál Tanı qatysyp jatyr. HAMAS ókilderi kelissózderge qosylmady. Degenmen, bitimgerler osy kezdesýden keıin HAMAS-tyń Dohadaǵy kelissóz tobymen keńesýdi josparlap otyr.
Atysty toqtatý jónindegi osy kelissózder qaıta bastalǵannan keıin, kepilge alynǵan adamdardyń otbasylary men olardyń jaqtastary Tel-Avıvte mıtıng ótkizip, úkimetti Gaza sektorynda tutqynda otyrǵandardy bosatý týraly kelisimge kelýge shaqyrdy.
Palestına prezıdenti Mahmýd Túrkııaǵa saparmen baryp, Túrkııa parlamentiniń arnaıy otyrysynda sóz sóıledi. Abbas óz ómirine qaýip tónse de, Gaza sektoryna barýǵa nıetti ekenin málimdedi.
«Men Palestına basshylyǵyndaǵy basqa da adamdarmen birge Gazaǵa barýdy sheshtim. Tipti, bul sapar meniń ómirime qaýip tóndirse de, Gazaǵa saparlamaqpyn. Bizdiń ómirimiz sondaǵy balalardyń ómirinen artyq emes», - dedi Abbas.
Izraıldiń «El-Al» ulttyq áýe kompanııasy 2024 jyldyń ekinshi toqsanynda rekordtyq tabys alǵanyn habarlady. Óıtkeni birneshe halyqaralyq kompanııa Gazada jalǵasyp jatqan soǵys pen aımaqtyq shıelenistiń kúsheıýi saldarynan Izraılge reısterin toqtatty.
«El-Al» kompanııasynyń habarlaýynsha, birinshi toqsanda 80,5 mln dollar tabys bolsa, ekinshisinde 147,4 mln dollar paıda tapty. Sonymen qatar, áýe kompanııasy óziniń eskirgen ushaqtaryn aýystyrý úshin Boeing-pen «737 MAX» úlgisindegi 31 ushaqty jetkizý týraly kelisim jasady.
Gaza sektorynyń Densaýlyq saqtaý mınıstrligi Gaza sektorynda soǵys bastalǵannan beri qaza tapqan palestınalyqtardyń sany 40 myńnan asqanyn habarlady.
Aq úıdiń Ulttyq qaýipsizdik keńesiniń ókili Djon Kırbı AQSh Irannyń Izraılge qarsy shabýyl jasaýy múmkindigi jaıynda nemese onyń qashan bastalatyny týraly bilmeıtinin, biraq bul shabýyl eshqandaı eskertýsiz bolýy múmkin ekendigi jóninde aqparat bar ekenin aıtty.
TsAHAL ókili Danıel Hagarı keıingi kúnderi Izraıl áskeri «Hezbolla» men Iran jaǵynan bolýy múmkin shabýylǵa baılanysty daıyndyǵyn arttyrǵanyn aıtty.
Beısenbi kúni keshke betperde kıgen 50 shaqty ızraıldik qonystanýshy Palestınanyń Djıt eldi mekenenine basyp kirip, 4 úı men 6 kólikti órtep jiberdi. Tártipsizdik saldarynan 20 jastaǵy palestınalyq jigit kóz jumdy.
Izraıl premer-mınıstri Bınıamın Netanıahý men prezıdent Isaak Gertsog osy qonystanýshylar jasaǵan tártipsizdikterdi aıyptap, kináliler jaýapqa tartylady dep ýáde berdi.
Izraıldiń ishki ister mınıstri Moshe Arbel quqyq qorǵaý organdaryn sotqarlyq jasaǵan qonys aýdarýshylarǵa qarsy shara qoldanýǵa shaqyrdy.
כ-50 ישראלים רעולי פנים נכנסו לכפר ג'ית והחלו להצית רכבים@Doron_Kadosh @hod_barel pic.twitter.com/EB0uPKSzjS
— גלצ (@GLZRadio) August 15, 2024
