15 shildeden bastap Qazaqstanda temeki qymbattaıdy

ASTANA. KAZINFORM — Qarjy mınıstrliginiń memlekettik kirister komıteti temekiniń barlyq túri qymbattaıtynyn eske saldy.

«2024 jylǵy 15 shildeden bastap „Fıltrli, fıltrsiz sıgaretterge, papırostarǵa, sıgarıllalarǵa jáne qyzdyrylatyn temekisi bar buıymdarǵa eń tómen bólshek saýda baǵalaryn belgileý týraly“ Qazaqstan Respýblıkasy Qarjy mınıstriniń 2022 jylǵy 22 aqpandaǵy № 196 buıryǵyna ózgeris engiziledi», — dep jazady komıtettiń resmı saıty.

Buıryq boıynsha, bólshek saýdada temeki ónimderi úshin mynandaı eń tómengi baǵalar qoldanylady:

fıltrli, fıltrsiz sıgarettiń 20 danasyna (bir qorabyna), papırosqa, sıgarıllaǵa jáne qyzdyrylatyn temekisi bar buıymdarǵa:

• 2024 jylǵy 15 shildeden 31 jeltoqsanǵa deıin — 820 teńge;
• 2025 jylǵy 1 qańtardan bastap — 870 teńge.

Aıta ketý kerek, qazir temekiniń eń tómengi baǵasy 770 teńge dep belgilengen.