Pavlodar oblysynda 15 sáýirden bastap balyq aýlaýǵa ýaqytsha tyıym salynady
PAVLODAR. KAZINFORM – Ýyldyryq shashý kezeńine baılanysty 15 sáýirden Pavlodar oblysynda balyq aýlaýǵa tyıym salynady.
Sáýirdiń 15-i men mamyrdyń 30-y aralyǵynda óńirdegi barlyq sý aıdyndarynda balyq aýlaýǵa ýaqytsha tyıym salynady. Bul ýaqytta oblystaǵy Sátbaev arnasynyń sý toraptarynan ǵana áýesqoı balyq aýlaýǵa ruqsat etiledi. Al oǵan arnaıy joldama qajet jáne balyqshy basyna lımıt belgilengen.
«Zaısan-Ertis oblysaralyq basseındik balyq sharýashylyǵy ınspektsııasy» RMM basshysynyń orynbasary Nurjan Qaztaıdyń aıtýynsha, Ertis ózeni men onyń saǵalarynyń barlyǵynda baqylaý júrgiziledi. Buǵan qosa tuzdy kólder boıynsha 1 naýryz ben 15 maýsym aralyǵynda artemııa salına qurtynyń jumyrtqalaryn jınaýǵa jáne daıyndaýǵa da tyıym salynǵan. Balyq aýlaý bul ýaqytta tek Sátbaev arnasynyń sý toraptarynda júrgiziledi. Áýesqoı balyqshylar torta, taban, alabuǵa, móńke jáne shortandy aýlaýǵa ǵana quqyly. Olar ózderimen birge joldama jáne jeke kýálikterin alyp júrýi kerek.
«Ýyldyryq shashý kezeńinde jergilikti balyq ınspektsııasynyń jumysy da qyza túsedi. Sebebi tyıymǵa qaramastan ózen jaǵalaǵandar aý laqtyryp, muz astynan shyǵyp azyq izdegen mol balyqty oljalap qalýdy kózdeıtini belgili. Kánigi balyqshylar mundaı ýaqytta sý aıdyndaryna jolamaıdy. Zańdy buzatyndar – balyq aýlaýdy zańsyz kásip kózine aınaldyryp, brakonerlikpen aınalysatyndar. Byltyr Pavlodar oblysynda tabıǵat qorǵaý zańnamalaryn buzǵan 27 azamat anyqtaldy. Olardan ruqsat etilmegen aýlaý quraldary men aýlar jáne úsh qaıyq tárkilendi. Jalpy mólsheri 640 myń teńge aıyppul salyndy», - deıdi ol.
Negizi óńirdiń ózen-kólderinde 20-dan asa balyq túri bar. Sonyń ishinde orys bekiresi, súırik, kókshubar, paıdabalyq, shortan, torta, aqqaıran, aq amýr, ońǵaq, taban, altyn tústi móńke, sazan (tuqy), aq dóńmańdaı, kádimgi jaıyn, nálim, bersh, kádimgi kókserke, ózen alabuǵasy kezdesedi. Bekire tuqymdastardy jáne Qyzyl kitapqa engen nelmany aýlaýǵa múlde tyıym salynǵan.
Bıyl sáýir-mamyr aılary aralyǵynda sý aıdyndaryn ıesiz tastalǵan balyq aýlarynan tazartý jáne jaǵalaý aýmaqtaryn jınaý maqsatynda «Taza sý aıdyndary» tabıǵat qorǵaý aktsııasy jalǵasyn tabady.
