15 sáýirde qaraǵandylyq jastarǵa arnalǵan ıpoteka iske qosylady
ASTANA. KAZINFORM — Qaraǵandy oblysynda 15 sáýirden bastap jastarǵa arnalǵan jeńildikti ıpotekaǵa ótinimder qabyldanady, dep habarlaıdy oblys ákimdiginiń baspasóz qyzmeti.
Qaraǵandyda, Temirtaýda jáne Saranda 15–23 sáýir aralyǵynda jumys isteıtin jastardan jeńildikti ıpoteka alýǵa ótinishter qabyldanady. Baǵdarlamaǵa qatysý sharttary týraly óńirlik kommýnıkatsııalar qyzmetinde ótken brıfıngte aıtyldy.
Jumys isteıtin jastarǵa jeńildetilgen ıpotekalyq nesıe berý baǵdarlamasy Qaraǵandyda 2022 jyly iske qosyldy. 2024 jyly ol Temirtaý men Saran turǵyndaryna qoljetimdi boldy.
— Baǵdarlamany júzege asyrýǵa oblystyq bıýdjetten jyl saıyn 500 mıllıon teńge kóleminde «Otbasy banki» jelisi boıynsha qosa qarjylandyrýmen 1 mıllıard teńge bólindi. Úsh jyl ishinde 350 ıpotekalyq qaryz maquldandy. Jalpy oblys boıynsha 2,1 mıllıard teńge bólý josparlanyp otyr. Osy qarajat aıasynda 107 jeńildikti ıpotekalyq qaryz beriledi dep josparlanǵan, — dedi jastar saıasaty máseleleri basqarmasynyń basshysy Aısulý Ernııazova.
Baǵdarlama aıasynda jas mamandar jyldyq 6%-ben 20 mln teńgege deıin ıpotekalyq qaryz ala alady. Eń uzaq merzimi — 19 jylǵa deıin. Bastapqy jarna — qaryz somasynyń 10%. Turǵyn úıdi birinshi jáne ekinshi naryqta tańdaýǵa bolady, alaıda sońǵy jaǵdaıda úı 1974 jyldan buryn salynbaýy tıis.
Baǵdarlamaǵa bilim berý, densaýlyq saqtaý, mádenıet, sport, áleýmettik qyzmetkerler men kommýnaldyq qyzmet qyzmetkerleri qatysa alady. Bıyl tizimge jumysshy mamandyqtarynyń ókilderi, «Qazposhta» AQ, TJD qyzmetkerleri, jetim balalar men ata-anasynyń qamqorlyǵynsyz qalǵan balalar jáne t. b. kirdi.
Basty sharttardyń biri — ótinish berýshiniń nemese onyń jubaıynyń sońǵy bes jyl ishinde jeke turǵyn úıiniń bolmaýy.
— Jeńildikti baǵdarlamanyń arqasynda jas jumysshylar bıyl qonys toıyn toılaı alady. Jaqyn kúnderi Qaraǵandy ákimdiginiń saıtynda jáne @otbasybank _ karaganda Instagram-akkaýntynda baǵdarlamaǵa qatysý úshin qajetti qujattar týraly aqparat ornalastyramyz. Ótinish bergen soń «Otbasy bank» mamandary izdenýshiniń qujattar paketin, onyń tólem qabilettiligin, nesıe tarıhyn tekseredi. Mysaly, jubaısyz jáne balasyz adam qaryz alý úshin aıyna kem degende 221 myń teńge tabýy kerek. Eger eki balasy bar otbasy bolsa, onda jalpy tabys 370 myń teńgeden kem bolmaýy tıis. Ipoteka boıynsha tólem somasy alǵashqy 8 jylda 184 myń teńgeni jáne kelesi 11 jylda 91 myń teńgeni quraıdy, — dep túsindirdi «Otbasy banki» AQ Qaraǵandy oblystyq fılıalynyń bıznesti damytý bóliminiń bastyǵy Sultan Aıdarhanov.
Baǵdarlamaǵa 35 jasqa deıingi jastar qatysa alady.
Osyǵan deıin habarlanǵandaı, Premer-mınıstrdiń orynbasary — Ulttyq ekonomıka mınıstri Serik Jumanǵarın Salyq kodeksiniń jańa redaktsııasyndaǵy bankterge usynylǵan qosymsha salyq júktemeleri ıpoteka paıyzyn ósiretinin málim etti.