15 sáýir – Qozy Kórpesh - Baıan Sulý kúni
ASTANA. QazAqparat – Qazaqstanda búgin «Qozy Kórpesh - Baıan Sulý» kúni. Jyldaǵy dástúr boıynsha ulttyq ǵashyqtar kúni elimizde 15 sáýirde atalyp ótedi, dep habarlaıdy QazAqparat tilshisi.
Elimizde buryn ǵashyqtar kúni aqpan aıynda atalyp ótip júrgen halyqaralyq ǵashyqtar kúnimen baılanystyrylatyn. Osy halyqaralyq ǵashyqtar kúnine balama retinde Qozy Kórpesh pen Baıan Sulýdyń mahabbatyna arnalǵan merekeli kúndi belgileý usynylǵan edi.
Bul turǵyda keıingi jyldary ulttyq ǵashyqtar merekesin atap ótý keń tarap keledi.
Ótkenge kóz júgirtsek, bul kúndi atap ótý osydan 20 jyldan astam ýaqyt buryn bastalǵan degen derekter bar. Alaıda, bul kúndi «Ulttyq ǵashyqtar kúni» retinde atap ótý 2011 jyldan bastalǵany týraly da málimetter kezdesedi.
2011 jyly Almaty qalasy ákimdiginiń jastar saıasaty basqarmasy bul kúndi ózderiniń resmı sharalarynyń qataryna qosqan. Osy jyldan bastap-aq óńirler ǵashyqtar kúnin keń aýqymda atap óte bastady.
13-14 ǵasyrlardaǵy «Qozy Kórpesh - Baıan Sulý» eposy bir-birine qosyla almaǵan ǵashyq jas jigit pen qyzdyń qaıǵyly mahabbatyn jyrlaıdy. Jaqsylyq pen jamandyq, dúnıeqońyzdyq pen kóre almaýshylyq, kek pen ashýǵa tap bolǵan qos júrek bir-birine degen názik sezimderin saqtaı bilgen. Olardyń mahabbat tarıhy osy adaldyqtarymen qundy.
