15 naýryzdan bastap «Túrkistan-Samarqand» áýe reısi ashylady

TÚRKІSTAN. KAZINFORM- Qalalar arasyndaǵy avıabılettiń quny - 25 697 teńgeden bastalady.

«Qazaq Air» áýekompanııasy 15 naýryzda «Túrkistan-Samarqand» áýe qatynasyn iske qosady. Reıster zamanaýı, jaıly «De-Havilland Dash 8-Q400» áýe laınerlerimen aptasyna 2 ret, juma jáne jeksenbi kúnderi oryndalady. Túrkistan qalasynan jergilikti ýaqyt boıynsha 20:20-da, al Samarqandtan 21:20-da ushady.

«Jańa áýe qatynasy - Qazaqstan men Ózbekstan arasyndaǵy saýda-ekonomıkalyq, mádenı, iskerlik jáne týrıstik yntymaqtastyqty odan ári damytýǵa yqpal etpek. Sondaı-aq Túrkistan qalasyna keletin týrıster sanynyń artýyna edáýir áser etedi. Bir jaqty avıabılettiń quny - 25 697 teńgeden bastalady. Bıletter qazirgi tańda satylymda», -delingen Túrkistan oblysynyń óńirlik kommýnıkatsııalar qyzmeti taratqan aqparatta.