15 naýryzda «Referendým – 2026» onlaın marafony ótedi
ASTANA. KAZINFORM – 2026 jyldyń 15 naýryzynda aýqymdy medıajoba – «Referendým – 2026» onlaın marafony ótedi. Marafon saǵat 09:00-de bastalyp, túngi 00:15-ke deıin jalǵasady.
15 saǵatqa sozylatyn tikeleı efır el ómirindegi mańyzdy saıası oqıǵanyń barysyn jan-jaqty qamtyp, referendým kúniniń negizgi sátterin, qoǵam pikiri men sarapshylar kózqarasyn kórermenge jedel ári zamanaýı formatta usynady.
Naýryznama onkúndigi aıasynda ótetin marafon — tek aqparattyq shara emes, qoǵamdaǵy ózekti máselelerdi talqylaıtyn, jańa ıdeıalar men tehnologııalyq bastamalardy tanystyratyn biregeı alań. Іs-sharaǵa saıası qaıratkerler, qoǵamǵa tanymal azamattar, óz salasynda tabysqa jetken mamandar, óner men mádenıet ókilderi jáne startaperler qatysyp, el damýynyń mańyzdy baǵyttary jóninde pikir almasady.
Joba barysynda kórermender zamanaýı tehnologııalyq sheshimder arqyly usynylatyn erekshe kórinisterdi de tamashalaı alady. Otandyq ónertapqyshtar jasaǵan robottar baǵdarlama júrgizýge qatysyp, gologramma-shoý arqyly elimizdiń sońǵy jyldardaǵy jetistikter shejiresi usynylady.
— Marafon aıasynda 5 alań jumys isteıdi. Sahnada qoǵam qaıratkerleri, ónertapqyshtar, qaıyrymdy isimen tanylǵan azamattar óz oı-pikirlerin ortaǵa salyp, kontserttik baǵdarlama usynylady. Sarapshylar men qoǵam ókilderiniń qatysýymen ózekti taqyryptarǵa arnalǵan pikirtalastar ótip, ınnovatsııalyq jobalar men otandyq startaptar tanystyrylady. Sonymen qatar marafon barysynda qonaqtarmen blıts-suhbattar júrgizilip, el aımaqtary men shetelden tikeleı qosylymdar uıymdastyrylady, — delingen habarlamada.
Onlaın marafon respýblıkalyq jáne aımaqtyq buqaralyq aqparat quraldarynyń resmı saıttary men áleýmettik jeli paraqshalarynda tikeleı kórsetiledi.
Aıta ketelik referendým kúni 10 473 ýchaske jumys isteıdi.