15 naýryzda Qyzylorda oblysynda 378 referendým ýchaskesi jumys isteıdi
QYZYLORDA. KAZINFORM – Qyzylorda oblysynda aýmaqtyq referendým komıssııasy 15 naýryzǵa belgilengen respýblıkalyq referendýmdy uıymdastyrý máselelerine qatysty daıyndyqty bastap ketti.
Sol kúni 9 aýmaqtyq, 378 referendým ýchaskesi jumys isteıdi. Onyń 126-y Qyzylorda qalasynda, qalǵandary aýdandarda ornalasqan.
- Oblys boıynsha ýchaskelik referendým komıssııasynyń 2705 múshesi qyzmet atqarady. Ýchaskeler jabdyqtalyp jatyr. Daýys berý kabınalary arnaıy shırmamen jabdyqtalyp, múgedektigi bar azamattarǵa qolaıly jaǵdaı jasalady. Bul rette jergilikti ákimdiktermen birlese jumys atqaryp jatyrmyz. Aımaqta 497 350 daýys berýshi azamat tizimge engizilgen, - dedi oblystyq aýmaqtyq referendým komıssııasynyń tóraǵasy Ádilbek Ersultanov.
Komıssııa músheleri oqyp, biliktiligin arttyrady. Qala jáne aýdandardaǵy aýmaqtyq saılaý komıssııasynyń 56 múshesi men ýchaskelerdegi 1190 komıssııa múshesi kóshpeli oqýǵa tartylady. Qalǵan komıssııa músheleri kaskad ádisimen oqytylady.
- Búgingi kúni Qyzylorda oblysynda 23 qoǵamdyq birlestik akkredıttatsııadan ótkizildi. Olar referendým protsesi kezinde baqylaý jumysyn júrgize alady, - dedi komıssı tóraǵasy.
Eske salaıyq, Konstıtýtsııa jobasyna qatysty referendým qorytyndysy 21 naýryzǵa deıin jarııalanady.