15 naýryzda qabyldanatyn sheshim eldiń erteńine qatysty sanaly azamattyq ustanymnyń kórinisi bolmaq - Balaeva
ASTANA. KAZINFORM - Premer-mınıstrdiń orynbasary – Mádenıet jáne aqparat mınıstri Aıda Balaeva 15 naýryzda elimizde ótetin referendýmǵa qatysty pikir bildirdi.
-Qurmetti dostar!
Barshańyzǵa málim, Respýblıkalyq referendýmǵa da sanaýly kún qaldy. Qazir elimizdiń barlyq óńirinde jańa Konstıtýtsııa jobasynyń máni men mańyzyn túsindirýge baǵyttalǵan keń aýqymdy aqparattyq-túsindirý jumystary júrgizilip jatyr.
Osy maqsatta qurylǵan «Ádiletti jáne Progressıvti Qazaqstannyń Halyqtyq Konstıtýtsııasy úshin!» Jalpyulttyq koalıtsııasy tóraǵasynyń orynbasary retinde men úshin árbir azamattyń reformanyń shynaıy mazmunyn tereń túsinýi aıryqsha mańyzdy. Óıtkeni 15 naýryzda qabyldanatyn sheshim eldiń erteńine qatysty sanaly azamattyq ustanymnyń kórinisi bolmaq,-dep jazdy Aıda Balaeva óziniń Facebook paraqshasynda.
Onyń sózinshe, eń aldymen, búkil qujattyń maǵynalyq ózegin aıqyndaıtyn preambýlaǵa toqtalǵan jón. Ol «Biz, birtutas Qazaqstan halqy…» degen sózdermen bastalady. Osy mańyzdy tujyrym memlekettegi bıliktiń birden-bir qaınar kózi halyqtyń ózi ekenin, Konstıtýtsııanyń shynaıy avtory el azamattary ekenin bildiredi.
Jańa jobada «baıyrǵy qazaq jerindegi memlekettilikti nyǵaıtý» jáne «Uly Dalanyń myńjyldyq tarıhynyń sabaqtastyǵy» aıqyn kórsetilgen. Bul qazirgi Qazaqstan Respýblıkasynyń tarıhı tamyry tereń, ulttyń bolmysy men rýhanı murasyn saqtaý jolyndaǵy sabaqtastyq saqtalatynyn aıqyndaıdy.
Sonymen qatar memlekettiń ýnıtarlyq sıpaty, shekaranyń myzǵymastyǵy men aýmaqtyq tutastyǵy naqty bekitiledi. Búgingi kúrdeli geosaıası jaǵdaıda bul qaǵıdattardyń konstıtýtsııalyq deńgeıde bekitilýi – eldiń tutastyǵy men turaqtylyǵynyń basty kepili. Qazaqstan árdaıym birtutas, bólinbeıtin memleket bolyp qala beredi.
Preambýlada alǵash ret elimizdiń damý baǵytyn aıqyndaıtyn mańyzdy qundylyqtar da kórinis tapqan. Atap aıtqanda, Ádiletti Qazaqstan ıdeıasy men «Zań men Tártip» qaǵıdaty. Bul negizgi ustanymdar quqyq ústemdigin qamtamasyz etýge, zań aldynda barshanyń teńdigin ornyqtyrýǵa jáne bıliktiń qoǵam aldyndaǵy jaýapkershiligin arttyrýǵa baǵyttalǵan.
Jańa Ata zań adam quqyǵy men bostandyǵyn basty orynǵa qoıady. Osylaısha, adam jáne onyń qadir-qasıeti konstıtýtsııalyq modeldiń ózegine aınalyp otyr.
Qoǵamdaǵy birlik, yntymaq, etnosaralyq jáne konfessııaaralyq kelisim qundylyqtary da erekshe atap ótilgen. Dál osy qundylyqtar elimizdegi beıbitshilik pen turaqtylyqtyń berik negizin qalyptastyrady. Mádenıet, bilim, ǵylym men ınnovatsııany damytý, sondaı-aq tabıǵatqa uqypty ári jaýapkershilikpen qaraý da eldiń jańǵyrý jolyndaǵy basty basymdyqtar retinde kórinis tapqan.
Biz beıbitshilik pen barlyq memlekettermen syılastyqqa negizdelgen dostyq qarym-qatynas ornatýǵa umtylamyz jáne keleshek urpaq aldyndaǵy tarıhı jaýapkershiligimizdi tereń sezinemiz.
-Preambýla «…Qazaqstan Respýblıkasynyń Ata Zańyn – osy Konstıtýtsııany qabyldaımyz» degen sózdermen aıaqtalady. Bul qoǵam bolyp sanaly túrde uıysyp, el bolashaǵyna ortaq jaýapkershilik júgin birge kóterýge degen daıyndyqtyń kórinisi dep bilemin,-dedi Premer-mınıstrdiń orynbasary.
11 aqpanda Memleket basshysy referendým ótkizý týraly Jarlyqqa qol qoıdy.