15 naýryz – Qaıyrymdylyq kúni: Astanalyq volonterler baýyrsaq pen ystyq sháı taratty
ASTANA. KAZINFORM – Astanada Naýryznama aıasynda qala turǵyndary men qonaqtaryna baýyrsaq, ystyq sháı men shokoladtar taratyldy.
«Búgin astanalyq volonterler qala turǵyndary men qonaqtaryna baýyrsaq, ystyq sháı, shokolad taratyp jatyr. Olar adam kóp júretin, jınalatyn oryndardy aralaıdy. Maqsat – adamdardy bir-birine qamqor, meıirimdi bolýǵa shaqyrý. Osy sekildi is-sharalar bizde jıi ótkizilip turady. Keıde eriktiler ózderi bastama kóterip, bizge júginedi. Jastar kóp jaǵdaıda usynystar jasap, belsendilik tanytady», - dedi «Astana jastary» jastar resýrstyq ortalyǵy eriktiler qozǵalysyn damytý bóliminiń mamany Aızat Abıbýllaqyzy.
Mamannyń aıtýynsha, ásirese 14 pen 22 jas aralyǵyndaǵy volonterler qoǵamdyq jumysqa belsendi aralasady.
«Olar - mektep oqýshylary jáne stýdentter. Máselen, búgingi is-sharaǵa 20 shaqty volonter qatysyp otyr. Jalpy, bizdiń volonterler birneshe baǵyt boıynsha qaıyrymdylyq aktsııalarymen aınalysady. Odan bólek, eriktiler elordada ótetin mádenı jáne sporttyq is-sharalarǵa belsene qatysady. Eger kámelet jasyna tolmaǵan jasóspirim volonter bolǵysy kelse, aldymen mindetti túrde ata-anasynyń ruqsatyn alamyz», - deıdi ol.
Aktsııa qatysýshylarynyń biri - 9-synyp oqýshysy Raýan Qodarov, onyń volonter bolǵanyna 4-5 aı ǵana bolǵan. Jas eriktiniń aıtýynsha, volonter bolý - jańa dostar taýyp, jalpy tájirıbe jınaýǵa mol múmkindik.
«Búgin qaıyrymdylyq kúni. Osy oraıda biz kóshe aralap, adamdarǵa baýyrsaq, ystyq sháı jáne shokolad tarataıyq dep sheshtik. Bul dástúr bizde jyl saıyn uıymdastyrylady. Qaıyrymdy bolýdy nasıhattaý maqsatynda kommýnaldyq qyzmet jumysshylaryna da baýyrsaq beriledi, mysaly qar tazalaýshylar jylynyp alsyn dep ystyq sháı taratamyz. Volonter bolýǵa ózim qyzyǵýshylyq tanyttym, «Astana jastary» uıymynyń áleýmettik jelisi arqyly bilip, jazyldym. Bizdiń maqsat – ártúrli qaıyrymdylyq is-sharalar men aktsııalarǵa qatysý, uıymdastyrý jumysyna kómektesý. Atap aıtsam, qarttarǵa úı aýlasyn qardan tazartýǵa kómektesemiz, sondaı-aq dúken men dárihanadan qajetti zattaryn ákelip beremiz. Sonymen qatar muqtaj jandarǵa azyq-túlik sebetin taratýǵa atsalysamyz», - deıdi ol.
Aıta ketsek, búginde Astanadaǵy jastar ortalyǵynda 6 myńnan astam volonter bar.
«Qaıyrymdylyq qorlary men volonterlik uıymdar túrli baǵyttaǵy is-sharalardy uıymdastyrady. Bastysy - muqtaj jandarǵa kómektesý, qol ushyn sozý. Sonymen qatar volonterler qozǵalysynyń qyzmeti – adamzatqa qatysty problemalarǵa qoǵamnyń nazaryn aýdarý, mysaly qorshaǵan ortaǵa qamqor bolyp, taza ustaý, qarýsyz ıtter men mysyqtardy qorǵaý. Biz qaıyrymdylyq aktsııalaryn ótkizý arqyly adamdardy meıirimdi, bir-birine qamqor bolýǵa shaqyramyz jáne volonter bolyp júrgen jetkinshekter qaıyrymdy bolýdy bilip ósedi», - dedi «Astana jastary» jastar resýrstyq ortalyǵy volonterler qozǵalysyn damytý bóliminiń jetekshisi Elvıra Esimhanova.
