15 myńnan astam astanalyq koronavırýstan jazyldy – Altaı Kólginov
«Bıylǵy jyl dárigerler úshin qıyn boldy. Dárigerlerdiń kómegimen jáne olardyń tikeleı jumysymen qalamyzdyń 15 myńnan astam turǵyny COVID-19 aýrýynan jazylyp shyqty. Elbasynyń «Birgemiz» atty úndeýi men Memleket basshysynyń qadaǵalaýynyń nátıjesinde COVID-19 vırýsymen kúrestiń alǵashqy tolqynyn eńserip, daıyndyqty kúsheıttik. Qazirgi tańda elordada 176 adam em alýda. Salystyrmaly túrde aıtar bolsaq, jaz aılarynda bir kúnde 3911 adam em alyp jatqan bolatyn», - dedi ákim Ortalyq kommýnıkatsııalar qyzmetinde ótken brıfıngte.
Ákimniń aıtýynsha, qazir qaladaǵy jaǵdaı turaqtandy. Biraq ári qaraı da bul jumysty kúsheıtilgen túrde qadaǵalap otyrý qajet.
«Jyl basynda PTR testileý boıynsha bir ǵana zerthanamyz bolsa, qazir onyń sany 17-ge deıin artty. Testileý ýaqyty boıynsha, jaz aılarynda júkteme kúsheıgende 5 kúnge deıin kútýge týra keletin. Qazir zerthanalardyń qýaty artyp, test nátıjesi 4 saǵatta berilip jatyr. Statsıonarlarda ızotermııalyq mını-zerthanalar ornattyq, olar statsıonarda emdelip jatqan naýqastardyń testileý nátıjesin eki saǵatta kórsete alady», - dep túsindirdi A. Kólginov.
Sonymen birge, vedomstvoaralyq komıssııa sheshimimen elge keletin barlyq reıs jolaýshylarynan PTR anyqtamalary talap etiledi.
«Tıisti anyqtamasy joq jolaýshylardy karantın statsıonaryna jetkizemiz jáne tekserýden keıin ǵana qalaǵa kirgizemiz. 6 qazannan beri 4800 jolaýshy karantın statsıonaryna bardy, onyń 28-inen COVID-19 vırýsy anyqtaldy jáne emdeýge jiberildi», - deıdi ákim.