15 myń telesabaq túsiriledi - Ashat Aımaǵambetov
NUR-SULTAN. QazAqparat – 15 myń telesabaq túsiriledi. Bul týraly onlaın rejımde muǵalimderdiń qatysýymen ótken konferentsııada Bilim jáne ǵylym mınıstri Ashat Aımaǵambetov málim etti, dep habarlaıdy QazAqparat tilshisi.
Mınıstr qashyqtan oqytý kezinde úsh myńnan astam telesabaq daıyndalǵanyna toqtala kele, «Shynymen de eleýli jumystar atqaryldy. Qazir taǵy da 15 myń telesabaqty túsirýdi josparlap otyrmyz, sebebi bizge bolashaqqa daıyndalý kerek. Pandemııanyń ekinshi nemese úshinshi tolqyny bolmasa da, sabaq ótkizilmeıtin aıazdy kúnder kezdesedi. Sonymen qatar, qysta joldyń jabylýyna baılanysty tıisti merzimde balalar oqı almaıtyn jaǵdaılar da týyndaýy múmkin. Osyndaı kútpegen jaǵdaılar kóptep kezdesedi», - dedi.
Osy oraıda A. Aımaǵambetov telesabaqtar bilim berý úshin jaqsy tásil ekenin atap ótti.
«Jalpy, televızııalyq formatta daıyn bolýy úshin biz oqý jylynyń tutas tórt toqsanyndaǵy sabaqtardy túsirýdi jón sanadyq. Qazir arnaıy alańdy daıarlap jatyrmyz, onda árbir muǵalim óziniń sabaqtaryn tıisti talaptarmen túsirý múmkindigine ıe bolady», - dedi mınıstr.
Budan buryn habarlanǵandaı, mınıstr telesabaqtardy daıarlaýǵa belsendi qatysqan muǵalimderdi marapatady.
